जम्मू–कश्मीरको पछिल्लो अवस्था र त्यसमा भारतीय पक्षले गरेको सैन्य कारवाहीका सम्बन्धमा पाकिस्तानले संयुक्त राष्ट्रसंघलाई पत्र लेख्ने भएको छ ।
सीमा क्षेत्रको नियन्त्रण रेखामा सर्वसाधारण नागरिकलाई लक्षित गरी भारतीय सुरक्षाकर्मीले जेनेभा सन्धिले प्रतिबन्धित गरेको क्लस्टर बम प्रयोग गरेको आरोप लगाएको छ । भारतीय पक्षको आक्रमणका कारण दुईजनाको ज्यान गएको तथा ११ जना घाइते भएको जनाईएको छ ।
पाकिस्तानका विदेशमन्त्री शाह महमूद कुरेशीले भारतीय पक्षले अन्तर्राष्ट्रिय कानूनको उल्लंघन गरेको र त्यसबारे संयुक्त राष्ट्रसंघ सुरक्षा परिषदका सदस्यलाई पत्र लेखेर जानकारी गराउने तयारी गरेको पाकिस्तानी सञ्चारमाध्यमले जनाएका छन् ।
पाकिस्तानले कश्मीरको हालको अवस्था र भारतीय पक्षको गतिविधि बारे सुरक्षा परिषदका पाँच स्थायी सदस्य राष्ट्रलाई पत्रमार्फत जानकारी गराउने तयारी थालेको हो ।
नियन्त्रण रेखामा भारतले क्लस्टर बम प्रयोग गरेको प्रमाण सम्बन्धी तस्बिरहरु प्राप्त भएको र सबै प्रमाणसहित संयुक्त राष्ट्रसंघ सुरक्षा परिषदलाई यसबारे जानकारी गराउने तयारी भएको पाकिस्तानी विदेश मन्त्रीलाई उद्धृत गर्दै स्थानीय सञ्चारमाध्यमले जनाएका छन् ।
भारत प्रशासित जम्मू–कश्मीरको अवस्था बिग्रिएको र भारत त्यहाँ नयाँ हिंसा जन्माउन लागि परेको पाकिस्तानी विदेश मन्त्रीले आरोप लगाएका छन् ।
भर्खरै
लोकप्रिय
