जनकपुर – विदेश उडाएको पैसा नदिएको भन्दै महोत्तरीमा एक एजेन्टले एक गरीबको घर डोजर लगाएर भत्काएका छन् । महोत्तरीको भंगहा नगरपालिका १ कविलासा पूर्वारीटोल घर भएका पनित शेखको घर स्थानीय एजेन्ट बद्री ठाकुरले डोजर चलाएका हुन् ।
शनिबार आफ्नो सम्पूर्ण परिवारलाई घरबाट निकाला गरी एजेन्ट ठाकुरले एकाएक डोजर चलाएर भत्काएको शेखकी श्रीमती जाहिरा खातुनले दुखेसो गरेकी छिन् ।
घर भत्काएपछि शेखका सम्पूर्ण परिवार विस्थापित भएका छन् । उनीहरु अहिले सडक छेउमा त्रिपालको ओत लगाएर बसिरहेका छन् । यता महोत्तरीका प्रहरी उपरीक्षक श्यामकृष्ण अधिकारीले घटना विषयमा थोरै जानकारी भएको बताउदै पीडितले उजुरी लिएर आएको खण्डमा कारबाही गर्ने बताए ।
पीडितको जाहिरीका अनुसार शेख अहिले पनि साउदी अरबमा वैदेशिक रोजगारीमा छन् । आठ वर्ष अघि एजेन्ट बद्री ठाकुरले शेखलाई २० हजार रुपैयाँमा राम्रो काम र कमाई हुने कम्पनीमा विदेश पठाइदिने बताएपछि उनी विदेश गएका थिए ।
तर शेखले त्यहाँ गएपछि राम्रो काम र तलब पाएनन् । पीडित जाहिराका अनुसार पति शेख विदेश गएपछि आफ्नो ससुरा अहम शेखसँग एजेन्ट ठाकुरले छलेर ८५ हजार रुपैयाँको तमसुक बनाए । त्यही पैसाको व्याजको स्याज गरी एजेन्ट ठाकुरले मोटो रकम मागिरहेका थिए । उनले जिल्ला अदालत महोत्तरीमा मुद्दा समेत दिएका थिए ।
शेखको सम्पत्तिकाे नाममा ५ धुर घडेरी मात्र रहेको छ । त्यहि घडेरीमा टिनको छानो भएको काठ र माटोले बनाएको सानो घर थियो । शेखको ४ छोरी र २ छोरा छन् । विदेश गएपछि कमाएको पैसाले जेठी र माहिली छोरीको बिहे गरेको श्रीमती जाहिराले बताइन् । जाहिराको दुई छोरी विवाह गरेर आ-आफ्नो घर गैसकेको भएपनि घरमा १७ र १५ वर्षको दुई छोरी र १० र ८ वर्षका दुई छोरा छन् ।
घरमा एजेन्ट ठाकुरलाई दिन पतिले पठाएको डेढ लाख र आफ्नो बुबाले दिएको ५० हजार गरी २ लाख रुपैयाँ, केहि सुनचाँदीको गरगहना र खाद्यान्न, लत्ता कपडा समेत निकाल्न नदिएर घरमाथि डोजर चलाएर क्षति तुल्याएको पीडित जाहिराको दुखेसको छ ।
आफूहरुमाथि पैसा अशुल गर्न अदालतमा मुद्दा दिएपछि गत असार महिनामा एजेन्ट ठाकुरलाई हार गुहार गर्दै ३ लाख रुपैयाँ लिएर हरहिँसाब रफादफा गर्न भन्दा समेत नमानेको र अहिले आएर एकाएक घरमाथि डोजर चलाएर उठिबास गराएको जाहिराको भनाई छ ।
उनले आफ्नो न्यायको लागि पहल गरिदिन सबैपक्षसँग गुहार गरेकी छन् । जाहिराका अनुसार केहि वर्ष अघि एजेन्ट ठाकुर राति राति घरमा पसेर ऋण छोडिदिने भन्दै अनैतिक सम्बन्धको प्रस्ताव गरेका थिए । तर होहल्ला गरेपछि उनी भागेका थिए । जसको समाजमा पञ्चायत समेत भएको थियो । त्यो रिसइबी साँध्नलाई समेत घर तोडेको हुन सक्ने केही स्थानीयको भनाई छ ।
उता एजेन्ट ठाकुरले शेखको घर आफूले नभत्काएर जिल्ला अदालत महोत्तरी र प्रहारी प्रशासनले भत्काएको दाबी गरे । शेखले विदेश जाने प्रयोजनमा नभई घर व्यवहारको लागि ७ वर्ष अघि २ लाख ५० हजार आफूसँग लिएको ठाकुरको भनाई छ ।
यता भंगहा नगरपालिकाका नगर प्रमुख संजिवकुमार साहले आफूले दुवै बिचको लेनदेनको मुद्दा मिलाउन तीन पटक पहल गरेको, तर मुद्दा अदालतमा गएकाले यसमा आफूले चासो नदेखाएको बताए ।
भर्खरै
लोकप्रिय
