हङकङमा चलिरहेको राजनीतिक संकट र प्रजातन्त्रको पक्षमा भइरहेको प्रदर्शनलाई निरुत्साहित गर्नका लागि चीन सरकारको सहयोगमा भइरहेका गलत सूचना प्रवाह गर्ने अभियानविरुद्ध सामाजिक सञ्जाल ट्वीटर र फेसबुकले काम गर्न थालेका छन् ।
गलत सूचना प्रवाह गर्ने एकाउन्टहरु ट्वीटर र फेसबुकले डिलिट गर्ने अभियान चलाएका छन् । यसबाट हङकङको राजनीतिक अवस्थाबारे गलत सूचना रोक्न सकिने उनीहरुको विश्वास छ ।
ट्वीटरले ९३६ वटा एकाउन्ट खारेज गरेको छ । ती एकाउन्टहरु चीनबाट सञ्चालित रहेको र त्यसमार्फत हङकङमा भइरहेको प्रदर्शनको आधिकारिकता र राजनीतिक हैसियत कम गर्ने प्रयास भएको ट्वीटरले उल्लेख गरेको छ ।
फेसबुकले पनि सातवटा पेज, तीनवटा ग्रुप र पाँचवटा एकाउन्ट ‘रिमुभ’ गरेको जनाएको छ । यस्ता गतिविधिमा संलग्नहरुले आफ्नो पहिचान लुकाउन चाहेको भए पनि आफूहरुको अनुसन्धानले उनीहरु चीन सरकारसँग सम्बन्धित रहेको खुलेको जनाइएको छ ।
ट्वीटर र फेसबुक दुवैले यस्ता अरु पनि एकाउन्ट तथा पेजा या ग्रुपहरु रहेको र त्यसबारे अनुसन्धान भइरहेको बताएका छन् । आफूहरुका माध्यम गलत सूचना प्रवाह या बिस्तारका लागि प्रयोग हुन नदिनका लागि प्रतिबद्ध रहेको उनीहरुको भनाई छ ।
भर्खरै
लोकप्रिय
