सिमकोट – चिनियाँ सरकारबाट सिमाना जोडिएका जिल्लाहरुका लागि प्राप्त हुने बस्तुगत सहयोगलाई बृद्धि गर्न जनप्रतिनिधिहरुले आग्रह गरेका छन् ।
यस्तो सहयोग चिनियाँ सरकारले नगद नदिएर सीमा जोडिएका जिल्लाका गाउँपालिकाहरुका लागि निर्माण सामग्रीहरु प्रदान गर्दा सहयोगी हुने भएकाले यस्तो सहयोगमा बृद्धि गर्न आग्रह गरेका हुन् ।
सीमा जोडिएका जिल्लाहरुका लागि आउने चिनियाँ बस्तुगत सहयोगले भौतिक पूर्वाधार विकासमा सहयोग गरेकोले आउँदा वर्षहरुमा यस्तो सहयोग बृद्धि गर्न आग्रह गरिएको नाम्खा गाउँपालिकाका अध्यक्ष बिष्णुबहादुर लामाले बताए ।
बस्तुगत सहयोगबाट प्राप्त हुने सामग्रीहरुको काम गर्दा लाग्ने मिस्त्री खर्चका लागि गाउँपालिकालाई साझेदारी गर्न सहज भएको र यसमा सहयोगको दायरा तथा परिमाण बृद्धि गरे विकासमा अझै टेवा पुग्ने उनको भनाई छ ।
विशेष गरी चिनियाँ बस्तुगत सहयोगबाट विद्यालय भवन, स्वास्थ्य चौकी, सामुदायीक भवन, गुम्बा, तटबन्ध निर्माण र बाटो निर्माणका लागि ग्याबिनको प्रयोगमा निक्कै उपयोगी रहेका छन् ।
गत आर्थिक वर्षमा चिनियाँ बस्तुगत सहयोगबाट एक हजार दुई सय थान जस्तापाता, पाँच हजार केजी ग्याबिन, पाँच हजार केजी सिमेन्ट र चार हजार केजी सरिया प्राप्त भएको र यसबाट सातवटा पूर्वाधारका सरचना निर्माणमा सहयोग मिलेको गाउँपालिकाले जनाएको छ । यो सहयोगलाई थप बिस्तार गर्न समेत गाउँपालिकाले चिनियाँ पक्षलाई आग्रह गरेको छ ।
भर्खरै
लोकप्रिय
