मुख्यमन्त्री कार्यालयमा ताला लगाउन गएका ४३ शिक्षक पक्राउ

जनकपुरधाम – प्रदेश २ को मुख्यमन्त्री तथा मन्त्रिपरिषदको कार्यालयमा ताला लगाउन गएका अस्थाई शिक्षकहरु पक्राउ परेका छन् । मंगलवार बिहान मुख्यमन्त्री तथा मन्त्रिपरिषदको कार्यालयमा ताला लगाउन थालेपछि ४३ जना अस्थाई शिक्षकहरु पक्रउ परेको धनुषाका प्रहरी नायव उपरीक्षक रामेश्वर कार्कीले बताए ।

पक्राउ परेका सबैलाई जिल्ला प्रहरी कार्यालय धनुषामा राखिएको छ । अस्थाई शिक्षकहरुले सोमबार मुख्यमन्त्री तथा मन्त्रीपरिषदको कार्यालय अगाडि एक घण्टा सडक अवरुद्ध गरेका थिए ।

मुख्यमन्त्री लाल बाबु राउतले अस्थायी शिक्षकको मागप्रति प्रतिबद्धता जनाएर बेवास्ता गरेको भन्दै अस्थाई शिक्षकहरुको समूहले तालाबन्दीको प्रयास गरेको थियो । अस्थायी शिक्षकहरुलाई उमेरको हदसम्म पेशाको ग्यारेन्टी र स्वास्थ्य उपचार लगायत माग राख्दै असार २० गते देखि उनीहरु आन्दोलित छन् ।