पोखरा – दक्षिण एसियाली खेलकुद (साग) को १३ औँ संस्करण सुरु चार दिन बाँकी रहँदा पोखरा रंगशालामा भौतिक पूर्वाधारको काम भने सकिएको छैन ।
काठमाडौँ बाहिर पोखरामा पनि सागका केही खेल हुने निश्चित भएकाले रंगशालामा खेल मैदानसहितका पूर्वाधार निर्माण थालिएको थियो ।
विशेष गरी महिला फुटबलका लागि अहिले मैदान पुनर्निर्माण गरी काम सक्न व्यवस्थापनलाई सम्पूर्ण काम सक्न असम्भव जस्तै छ । तर खेल सञ्चालन गर्न भने कुनै कठिनाई नहुने निर्माण कम्पनीले जनाएको छ ।
रंगशाला पुनर्निर्माणको जिम्मा भारतको ग्रेट स्पोर्टस् इन्फ्रा (जिएसआई) र नेपाली कम्पनी एमए कन्स्ट्रक्सन जेभीले पाएको हो ।
मैदानका लागि आवश्यक दुबो कम्पनीले भारतबाटै झिकाएको थियो । पहिलो पटक ल्याइएको दुबो राम्ररी नसरेपछि पुनः दुबो रोप्नु परेको थियो । ६३ लाख रुपैयाँ लागतमा दुबो ल्याइएको निर्माण पक्षले जनाएको छ ।
भारतको कलकत्ताबाट बर्मुडा दुबो ल्याई मरेको दुबोको ठाउँमा पुनः रोप्ने काम सकिएको निर्माण कम्पनीका प्रोजेक्ट म्यानेजर इन्जिनियर दीपक बरालले जानकारी दिए । मैदानमा करिब ८६ हजार स्क्वायर फिट दुबो बिच्छ्याइसकिएको उनी बताउँछन् ।
खेल मैदानमा अर्को चुनौती प्यारापिट जडान पनि हो । करिब १० हजार सिट क्षमताको प्यारापिट बनाइने बताइए पनि हाल पहिलो चरणमा ३ हजार ८ सय क्षमताको मात्रै प्यारापिट जडान गरिँदैछ छ ।
दुई भागमा बन्ने प्यारापिटमध्ये एक भागमा मात्रै जडानको काम सकिएको छ । अर्को भागमा खेल सुरु हुने दिन अगावै सकिसक्ने इन्जिनियर बरालले बताए ।
मैदानको बाहिरी भागमा सिन्थेटिक एथ्लेटिक ट्रयाकको बाँकी काम पनि अन्तिम चरणमा पुगेको छ । साग खेल अन्तर्गत पोखरामा हुने तय भएका ९ खेलमध्ये प्याराग्लाइडिङ नहुने भएपछि ८ वटामात्रै हुने भएका छन् ।
पोखरामा ७ राष्ट्रका ७ सय २२ खेलाडी
(साग) अन्तर्गत पोखरामा हुने ८ खेलका लागि ७ सय २२ खेलाडी सहभागी हुने भएका छन् । पोखरामा हुने आर्चरी, भारोत्तोलन, ह्यान्डबल, फुटबल, विच भलिबल, ट्रायथोलन, ब्याडमिन्टन र महिला क्रिकेट खेलमा प्रतिस्पर्धाका लागि पुरुषभन्दा महिला खेलाडी बढी छन् ।
८ खेलका लागि ४ सय १ महिला र ३ सय २१ पुरुष खेलाडी सहभागी हुने १३ औं साग प्राविधिक समितिका सचिव बलराम लामाले जानकारी दिए । पोखरामा हुने खेलको लागि आयोजक नेपालले ८ खेलमा पुरुष ५२, महिला १ सय २ र अफिसियल २६ जनाउँदै छन् ।
भारतबाट ५ खेलका लागि १ सय ७२ जना खेलाडी तथा २५ जना अफिसियल हुनेछन् । जसमा ४१ जना पुरुष, ६१ जना महिला खेलाडी छन् । भारतबाट आर्चरी र महिला क्रिकेटमा खेलाडी सहभागी छैनन् ।
माल्दिभ्सबाट ५ खेलमा १ सय ३६ खेलाडी तथा ३४ अफिसियल सहभागी छन् । जसमा ४१ पुरुष र ६१ महिला खेलाडी सहभागी छन् । माल्दिभसले आर्चरी, भारोत्तोलन र ट्रायथोलनमा सहभागिता जनाएको छैन ।
बंगलादेशबाट ६ खेलका लागि पुरुष ५९ जना, महिला ५५ र ३६ जना अफिसियल गरी १ सय ५० जना सहभागी छन् । बंगलादेशले महिला फुटबल र ट्रायथोलनमा सहभागिता जनाएको छैन ।
पाकिस्तानबाट ५ खेलमा ९४ जना खेलाडी तथा २१ जना अफिसियलको सहभागिता छ । जसमा पुरुष ३८ र महिला ३५ छन् । पाकिस्तानले महिला फुटबल, महिला क्रिकेट र ट्रायथोलनमा सहभागिता जनाएको छैन ।
श्रीलंकाले ८ खेलमा १ सय ७५ जना खेलाडी तथा ३३ अफिसियलको सहभागिता छ । जसमध्ये पुरुष खेलाडी ६१ र महिला खेलाडी ८१ छन् ।
भुटानबाट ४ खेलका लागि पुरुष २९, महिला ६ र अफिसियल ७ जना गरी ४२ जना सहभागी छन् । प्रतियोगितामा सबैभन्दा कम खेलाडी भुटानबाट सहभागी भएका छन् । भुटानले ह्यान्डबल, महिला फुटबल, बिच भलिबल र ट्रायथोलनमा सहभागिता जनाएको छैन ।
पोखरामा ९ खेल हुने भनिए पनि प्याराग्लाइडिङ भने नहुने भएको छ । प्याराग्लाइडिङबाट नेपालले स्वर्णपदक आशा गरेको थियो ।
नेपालले स्वर्णको आशा गरेको खेल साग गेमबाट हटाइएको छ । साग गेममा २७ खेल हुने भनिएपनि २६ खेलमात्र हुने भएका छन् । जसमध्ये पोखरामा ८ खेलमात्र हुनेछन् ।
भर्खरै
लोकप्रिय
