सिमकोट – लहै लहैमा पहिले बाल विवाह गरेका हुम्लाका किशोरीहरु सानै उमेरमा विवाह गरेकोमा पश्चाताप गर्न थालेका छन् । आफ्नो अध्ययन छुटेको तर आफूसँगैका साथीसंगीहरु पढेलेखेर अगाडि बढेको देख्दा उनीहरुमा पश्चाताप देखिएको हो ।
१६ वर्षको उमेरमा विवाह गरेर १७ वर्षमा बच्चा जन्माएकी सर्केगार्ड गाउँपालिका वडा नम्बर २ रिपकी फुलमाया परियारलाई अहिले सानै उमेरमा विवाह गरेकोमा निक्कै पश्चाताप भएको छ । कक्षा नौमा अध्ययन गरिरहेको अवस्थामा विवाह गरेपछि उनको पढाई छुटेको थियो ।
त्यतिबेला साथी संगीको लहै लहैमा लागेर विवाह गरिएको भएपनि अहिले पश्चाताप लाग्ने गरेको उनले बताइन् । २० वर्षको उमेर हुँदा अहिले उनले दुई सन्तान जन्माएकी छन् ।
उनीसँगै अध्ययन गरेका साथिहरु अहिले उच्च शिक्षा अध्धयन गरिरहेका छन् । केही जागिरे पनि छन् । सानैमा विवाह गरेको कारण स्वास्थ्य पनि ठिक नभएको र महिनै पिच्छे स्वास्थ्य चौकीमा उपचारका लागि धाईरहनु परेको उनले बताइन् ।
यता रिप गाउँकै विश्व बिकले पनि १५ बर्षको उमेरमा विवाह गरिन् । १६ वर्षमै सन्तन भयो । साथीहरु पढेलेखेर अगाडि बढेको देख्दा आफूलाई भने पश्चाताप हुने गरेको उनले बताए ।
परियार र बिक रिप गाउँकी बाल विवाह गरेर पश्चातापमा रहेका नमूना किशोरी आमा हुन् । गत वर्ष मात्र उक्त गाउँमा आठ जना किशोरीहरुले बाल विवाह गरेका थिए ।
भर्खरै
लोकप्रिय
