सिमकोट । सडक सञ्जालसँग नजोडिएको हुम्ला जिल्लाको दक्षिणी क्षेत्र (जो कर्णाली करिडोर भित्र पर्छ) अब भने सडक सञ्जालसँग जोडिएको छ । कवाडी नदीमा कामको जिम्मा पाएको नेपाली सेनाले बेलिब्रीज निर्माण गर्ने कार्य सम्पन्न गरेपछि दक्षिणी हुम्ला सडक सञ्जालसँग जोडिएको हो ।
कवाडी नदीमा बेलिब्रीज जोड्ने कार्य सम्पन्न भएको खुलालु लैफु, कवाडी हुँदै सलिसल्ला खण्डको निर्माण कार्य जिम्मा पाएको आयोजनाका प्रमुख नेपाली सेनाका मेजर इन्जिनीयर मिलन कार्कीले बताए ।
पुलको सबै पार्टहरु जोड्ने कार्य सम्पन्न भएको र सलिसल्ला खण्डमा सडक निर्माणका सामग्री तथा इन्धन ओसार्ने गाडीहरु चलिरहेको भए पनि पुलमा ढलान कार्य भैरहेकोले सार्वजनिक गाडी भने सञ्चालनमा नआएको उनले बताए ।
हाल कालिकोटको खुलालु देखि बाजुराको र हुम्लाको सिमाना कवाडीसम्म ८४ किलोमिटरमा गाडी सञ्चालन भैरहेकोमा अब सो पुल जोडिएपछि हुम्ला खण्डको कवाडीदेखि अदानचुलीको दोमुखसम्मको ११ किलो मिटरमा पनि गाडी गुड्ने छ ।
दुर्गमको हिमाली जिल्ला हुम्लाको दक्षिणी क्षेत्र राष्ट्रिय सडक सञ्जालसँग जोडिएको अदानचुली गाउँपालिकाका अध्यक्ष दल फडेराले बताए । हुम्ला र बाजुरा जिल्ला जोड्ने कवाडी नदीमा नेपाली सेनाले बेलिब्रीज जोड्ने कार्य सम्पन्न गरेपछि हुम्ला जिल्ला औपचारिक रुपमा सडक सञ्जालसँग जोडिएको उनले बताए ।
पुलको निर्माण कार्य भएपछि जिल्लाका दक्षिणी क्षेत्रका अदानचुली र ताँजकोट गाउँपालिका राष्ट्रिय सडक सञ्जालसँग जोडिएका छन् । यसअघि उक्त गाउँपालिकाका जनताहरु दुई जिल्लाको सिमाना कवाडीमा गएर गाडी चढ्ने गरेको भएपनि अब पुल जोडिएपछि अदानचुलीका जनता दोमुख र ताँजाकोटका स्थानीयहरु पैमामा गएर गाडी चढ्न पाउने अध्यक्ष फडेराले बताए ।
पुल गत असारमै जाडिनुपर्ने भएपनि सुर्खेतमा रहेका पुलका सामानहरु कालिकोटको खुलालुमा कर्णाली नदीमा पानीको बहाब बढेपछि ती सामानहरु फेरीमा ढुवानी हुन नसके पछि काम रोकिएको थियो । निक्कै चर्चा पाएर पनि कार्य सम्पन्न हुन नसकेको कर्णाली करिडोर अन्र्गतग हुम्ला र बाजुरा जिल्ला जोड्ने कवाडी नदीमा बेलिब्रीज जोड्ने कार्य सम्पन्न भएको छ ।
नेपाली सेनाको जिम्मामा रहेको उक्त पुल जोडिए सँगै दक्षिणी हुम्ला राष्ट्रिय सडक सञ्जालसँग जोडिएकोमा स्थानीय बासीहरु निक्कै खुशी भएका छन् । कार्णाली करिडोर कै दोमुख देखि सलीसल्लासम्मको ५० किलोमिटरमा पनि नेपाली सेनाले काम गरिरहेको छ ।
भर्खरै
लोकप्रिय
