धनगढी – १८ दिन अघि कञ्चनपुरको शुक्लाफाँटा नगरपालिकाको कलुवापुरमा घर भित्रै मृत भेटिएका भण्डारी दम्पतीको हत्या आशंकामा उनका छोरालाई सोमबार प्रहरीले नियन्त्रणमा लिएको छ ।
भण्डारी दम्पती हत्या प्रकरणमा प्रहरीले अनुसन्धानका लागि मृतकका छोरा भरत भण्डारीलाई नियन्त्रणमा लिएको जनाएको छ ।
गत फागुन १५ गते घर भित्र मृत भेटिएका जयलाल भण्डारी र उनकी श्रीमती धनाको हत्यामा संलग्न भएको आशंकामा उनका छोरा भरत भण्डारीलाई प्रहरीले डडेल्धुराबाट पक्राउ गरि सोमबार कञ्चनपुर ल्याएको छ ।
कंचनपुर प्रहरीका प्रवक्ता रविन्द्रनाथ पौडेलले भरतले नै बुबा र कान्छी आमाको धारिलो हतियार प्रहार गरी हत्या गरेको आशंकामा पक्राउ गरी कञ्चनपुर ल्याईएको बताए । उनले विस्तृत जानकारी आजै पत्रकार सम्मेलmन मार्फत दिईने पनि बताए ।
कलुवापुरस्थित घरमै हत्या गरेको अवस्थामा भेटिएका भण्डारी दम्पती र छोराबिच लामो समयदेखि सम्पतिको विषयमा घरायसी विवाद रहेको स्थानीयले बताएका छन् । भण्डारीले जेठी श्रीमतीको मृत्यु भएपछि धनालाई दुई वर्ष अघि मात्र कान्छी श्रीमतिको रुपमा भित्र्याएका थिए ।
आमाबुबाको हत्यापछि घरमा बेहोस अवस्थामा भेटिएकी ७ महिनाकी छोरीको धनगढीको माया मेट्रो अस्पतालमा उपचार भइरहेको छ ।
भर्खरै
लोकप्रिय
