कोरोना भाइरसविरुद्ध प्रहरीको प्रयास, १६ स्थानमा पानी र साबुनको व्यवस्था

काठमाडौँ – प्रहरीले काठमाडौँका विभिन्न स्थानमा सरसफाइका लागि पानी तथा साबुनको व्यवस्था गरेको छ । मानिसको जमघट बढी हुने काठमाडौँका तीन स्थान तथा अस्पतालहरुमा पानीको ट्यांकी तथा साबुनको व्यवस्था गरेको हो ।

महानगरीय प्रहरी कार्यालयले १६ स्थानमा आइतबार बिहानदेखि पानीसहितको ट्यांकी र साबुनको व्यवस्था गरेको हो । गौशाला, बानेश्वर र जमल तथा १३ अस्पतालहरुमा पानी ट्यांकी र साबुनको व्यवस्था गरिएको प्रहरीले जनाएको छ ।

सर्वसाधारणलाई कोरोना भाइरसको संक्रमण जोगिनका लागि हात धुने व्यवस्था गरिएको हो । कोरोनाको संक्रमणबाट जोगिनका लागि साबुन पानीले राम्रोसँग हात धुने तथा अल्कोहलयुक्त सेनिटाइजर प्रयोग गर्नु पर्ने चिकित्सकले बताएका छन् ।