सिमकोट– सडक सञ्जालसँग नजोडिएको हिमाली जिल्ला हुम्लामा सरकारले लकडाउनकाबीच हवाई मार्गबाट खाद्यान्न ढुवानी गरिरहेकाे छ।
खाद्यान्न ढुवानी गर्दा नेपाल खाद्य व्यवस्था तथा व्यापार कम्पनी लिमिटेडको सिमकोटस्थित गोदामसम्म ट्याक्टरबाट ढुवानी हुन थालेको छ।
यसअघि विमानस्थलबाट गोदामसम्म मानिसहरुले खाद्यान्न ढुवानी गर्दा भिडभाड बढी हुने देखिएपछि स्थानीय प्रशासनको समन्वयमा ट्याक्टरमा ढुवानी गर्न थालिएको हो।
विमानस्थलबाट ७५ जना मानिसहरुले खाद्यान्न ढुवानी गर्दा अहिलेको कोरोना संक्रमणको त्रासदीका बेला बढी भिडभाड भएपछि ट्याक्टरमा खाद्यान्न ढुवानी गर्ने व्यवस्था गरिएको लिमिटेडका निमित्त प्रमुख शिवराज घिमिरेले बताए।
शनिबारसम्म भरियाले सो खाद्यान्न बोकेर ढुवानी गर्दै आएका थिए। आइतबारबाट विमानस्थलको एप्रोनबाट मुख्य गेटसम्म २० जना भरियाहरुले सामाजिक दूरी कायम गरी खाद्यान्न ढुवानी गर्ने र गेटबाट बजार हुँदै लिमिटेडको गोदामसम्म दुई वटा ट्याक्टरले ढुवानी गर्ने व्यवस्था गरिएको घिमिरेले बताए।
७५ जनाको जम्मो टोलीलाई खाद्यान्न ढुवानी गर्न लगाएपछि लकडाउनका बेला यसका विरोध हुन थालेको थियो। आइतबार मात्र तीन वटा एयरलाइन्सहरुले २२ उडान भरेर ३७५ क्वीन्टल ८७ केजी खाद्यान्न हुम्लामा ढुवानी गरेका छन्।
भर्खरै
लोकप्रिय
