सिमकोट – हुम्लामा एक चिकित्सकसहित १६ जना स्वास्थ्यकर्मी र कर्मचारी क्वारेन्टाइनमा बसेका छन् । केही समय अगाडि कार्यालयको काम र गोष्ठीमा सहभागिता जनाउन जिल्ला बाहिर जानु परेको र फर्कने तयारी गर्दा लकडाउन सुरु भएपछि पैदल हुम्ला आई पुगेका उनीहरु क्वारेन्टाइनमा बस्नु परेको हो ।
क्वारेन्टाइनमा रहेका चिकित्सक र स्वास्थ्यकर्मीहरुमा सिमकोटमा संञ्चालित हेल्थअस मेडिकल सेन्टरका डाक्टर, खार्पुनाथ गाउँपालिकाका दुई जना स्वास्थ्यकर्मी र केही समय अगाडि स्वास्थ्य सेवा कार्यालयमा ओजिटीमा आएका तर हाल पास आउट हुन बाँकी एक अहेब पढेका विद्यार्थी रहेका छन् । उनीहरु मध्ये तीन जना खार्पुनाथ गाउँपालिकामा स्थापना भएको क्वारेन्टाइनमा छन् ।
तीनैजनाको स्वास्थ्य अवस्था सामान्य रहेको खार्पुनाथ गाउँपालिकाका स्वास्थ्य शाखा प्रमुख बलीराज शाहीले बताए । सिमकोटमा रहेका अहेब पढेका विद्यार्थीको अवस्था पनि सामान्य रहेको सिमकोटको क्वारेन्टाइनका सूचना अधिकारी परजित बोहराले बताए ।
तर उनलाई सिमकोटको क्वारेनटाइनबाट वडा अध्यक्षको रोहबरमा वडामा लगिएको छ । हाल क्वारेन्टाइनमा रहेका डाक्टर हर्कसिंह भण्डारीले आफूलाई केही नभएको भएपनि सबैलाई बस्न सहज् होस भन्नका लागि नेपालगंजबाट पैदल आए लगत्तै क्यारेन्टाइनमा बसेको बताए ।
यता सिमकोटको क्वारेन्टाइनमा १३ जना कर्मचारीहरु रहेका छन् । उनीहरु पनि नेपालगंजबाट गाडीमा मुगुसम्म र त्यताबाट पैदल आएका हुन्। उनीहरु बैंक, गैरसरकारी संस्था, शिक्षक र अन्य कार्यालयमा काम गर्ने कर्मचारी हुन् ।
भर्खरै
लोकप्रिय
