कोरोना भाइरस विरुद्धको सम्भावित खोपको मानवीय परीक्षण युरोपमा पहिलोपटक सुरु भएको छ। सम्भावित खोपको परीक्षण अक्सफोर्डमा सुरु भएको जनाइएको छ ।
खोपको परीक्षणका लागि स्वतन्त्र रुपमा तयार भएका दुईजनालाई खोपको मात्रा प्रदान गरिएको बेलायती सञ्चारमाध्यमले जनाएका छन् । खोपको परीक्षणका लागि ८०० भन्दा बढी मानिसले आफ्नो नाम लेखाएका छन् ।
त्यसमध्ये आधालाई कोरोना भाइरस विरुद्धको खोप दिइने छ र बाँकी आधालाई मेनेनजाइटिसविरुद्धको खोप दिइनेछ, जसले कोरोना भाइरसकालाई नियन्त्रण गर्ने ठानिएको छ ।
तर खोप लगाउने प्राप्त गर्ने व्यक्तिलाई भने आफूलाई कुन खोप दिइएको छ भन्ने थाहा हुने छैन, डाक्टरहरुलाई मात्रै यसबारे जानकारी हुनेछ ।
कोरोना भाइरसविरुद्धको खोप लगाउने दुईजना मध्येकी एक एलिसा ग्रानाटोले आफू पनि एक वैज्ञानिक भएकाले वैज्ञानिक कार्यलाई सहयोग गर्ने उद्देश्यले खोप लगाउने निर्णय गरेको बताएकी छन् ।
अक्सफोर्ड विश्वविद्यालयकी भ्याक्सिनोलोजी प्राध्यापक सारा गिल्बर्ट नेतृत्वको टोलीले तीन महिना भित्रै निर्माण गरेको खोप मानवीय परीक्षणमा गएको हो ।
उनले भनेकी छन्, ‘व्यक्तिगत रुपमा मलाई यो खोपमा अधिक आशा छ । तर हामीले परीक्षण गर्नु पर्छ र मानवबाट तथ्यांक पनि लिनु पर्छ । खोपले वास्तवमै काम गर्न भनेर देखाउनु पर्छ ।’
यसअघि उनले खोपले काम गर्छ भन्नेमा आफू ८० प्रतिशत ढुक्क रहेको बताएकी थिइन् । तर उनले योपटक आँकडामा विश्वास व्यक्त गरेकी छैनन् । उनले आफू अति आशावादी रहेको उल्लेख गरेकी छन् ।
अक्सफोर्ड विश्वविद्यालयले यसअघि अर्को प्रकारको कोरोना भाइरस मर्सविरुद्धको खोप बनाएको थियो ।
यसअघि नै अमेरिका, चीन तथा जर्मनी, फ्रान्ससहितका देशमा पनि कोरोना भाइरसविरुद्धको खोप बनाउने प्रयास भएका छन् र कम्तिमा तीन खोप मानवीय परीक्षणको तहमा पुगेका छन् ।
यो पनि पढ्नुहोस्
भर्खरै
लोकप्रिय
