सिमकोट– कोरोना कहरले बन्दाबन्दी जारी रहेको अवस्थामा हुम्लामा दैनिक उपभोग्य वस्तुहरुको मूल्य आकासियकाे छ।
एकातिर एक महिनादेखि जिल्ला बाहिरबाट दैनिक उपभोग्य सामान भित्रिन नपाएको अवस्थामा ती सामानको अभावका साथै मूल्य पनि बृद्धि भएको हो।
होटेल मानसरोवरका सञ्चालक दन्त रावतले अचेल बजारमा दैनिक उपभोग्य सामानको मुल्यबृद्धि भएको बताए। उनले बजारमा खरिद गर्न जाँदा दैनिक उपभोग्य सामानको मूल्य एक सयदेखि एक सय पचास रुपियाँसम्म बढेको भएको उल्लेख गरे।
विशेषगरि बजारमा चिनी, मैदा, आटा, साबुन, तेल र मसला लगायतका दैनिक उपभोग्य सामानहरुको मूल्यबृद्धि गरिएको हो। आधा लिटर तेलको मुल्य १४० रुपैयाँबाट बढेर १६० रुपैयाँ पुगेको छ भने चिनीको प्रतिकेजी २२० रुपैयाँबाट २८० रुपैयाँसम्म पुगेको छ।
त्यस्तै अन्य उपभोग्य सामानको पनि मुल्य बृद्धि भएको छ। बन्दाबन्दी सुरु भएको करिब एक महिनाको अवधिमा दैनिक उपभोग्य सामानहरु हवाई मार्गबाट ढुवानी भएर आउन सकेको छैन।
एकातिर सामानको अभाव देखिन थालेको छ भने अर्कोतर्फ भएको सामानको मूल्यबृद्धि हुँदा उपभोक्ता मारमा परेका छन्।
उद्योग बाणिज्य संघका अध्यक्ष नाम्ग्याल तामाङले संघले बजारको अनुगमन गरी मूल्यबृद्धि गरेको भेटिए कारवाही गर्ने बताए। तर संघले पनि अनुगमन सुरु गरेको छैन।
स्थानीय प्रशासनले पनि बजार अनुगमन गर्ने कुनै सुरसार गरेको देखिँदैन।
भर्खरै
लोकप्रिय
