नयाँ दिल्ली- दिल्लीमा सोमबारदेखि खुलेका मदिरा पसलमा मानिसको घुइँचो देखिएको छ। हिन्दुस्तान टाइम्सका अनुसार मदिरा पसलहरुमा एक किलोमिटरसम्म मानिसको लाइन देखिएको छ।
पसलमा एक पटकमा पाँच जनाभन्दा बढी रहन नपाउने नियमबाबजुत मानिसहरुले कोरोना भाइरस संक्रमणविरुद्धका सामान्य सावधानीसमेत नअपनाइरहेको जनाइएको छ। दिल्लीको देशबन्धु गुप्ता रोडमा रहेको मदिरा पसलमा मानिसहरुको लामो लाइन र भिड देखिएको छ।
केही मदिरा पसलहरुको ग्राहकको भिडपछि खुलेको केही घण्टामै बन्द भएका थिए।
कोरोना भाइरसको जोखिम नरहेका दिल्लीका क्षेत्रहरुमा ४ सय ५० वटा मदिरा पसल खुल्न दिइएको भारतीय समाचार संस्था पीटिआईले जनाएको छ।
दिल्लीका सबै ११ जिल्ला कोरोना भाइरसको ‘रेड’ जोनमा छन्। मलहरुका मदिरा पसलहरु भने खुलेका छैनन्। दिल्लीमा पाँच सय ४५ वटा मदिरा पसल छन्। दिल्ली सरकारले केन्द्रीय सरकारको अनुमतिपछि खुल्न दिन मिल्ने मदिरा पसलको सूची तयार गरेको हो।
भारतको केन्द्रीय सरकारले केही दिनअघि मे १८ तारिकसम्म देशब्यापी लकडाउन लम्ब्याउने निर्णय गरेको थियो। पीटिआईका अनुसार दिल्लीमा ‘ग्रिन’ र ‘ओरेन्ज’ क्षेत्रसँगै रेड जोनका हटस्पटबाहेकका क्षेत्रमा मदिरा पसल र सुर्तिजन्य सामग्रीका पसलहरु खुल्न दिइएको छ।
भर्खरै
लोकप्रिय
