सिमकोट-नाम्खा गाउँपालिकाको वडा नम्बर ६ को हिमालपारीको गाउँ लिमीका बासिन्दा काठमाडौंबाट महंगो हवाई भाडा तिरेर उद्धार गरिएको छ । कोरोना कहरले बन्दाबन्दीका बेला काठमाडौंमा अलपत्र परेका लिमीका नागरिकहरुलाई उद्धार गर्न हवाई सेवाको ब्यबस्था भएपछि महंगो हवाई भाडा तिर्न बाध्य भएका हुन ।
काठमाडौंमा उकुश मुकुश गरि बस्नु भन्दा ऋण सापट गरि महंगो भाडा तिरेर लिमी जानु परेको नाम्खा गाउँपालिका वडा नम्बर ६ का पेम्वा तामाङले बताए। लिमी जाने सबैको सहमतिमा भाडा निर्धारण गरेर गएका हुन।
नेपालभित्रै हवाई भाडा भने महंगो तिर्नु परेको उनले बताए। नौ बर्ष माथिका सबै नागरिकहरुलाई पुरा भाडा लिईएको छ भने साना सानीसंगै बस्ने बालबालिकाको लागि मात्र इन्फेन्ट लगिएको छ।
बुधवार बिहान काठमाडौंबाट सीता एयरमा हुम्ला आएका ७५ जना लिमीका नागरिकहरुले प्रति ब्यक्ति चालीस हजार हवाई भाडा तिर्नु परेको नाम्खा गाउँपालिकाका अध्यक्ष बिष्णु बहादुर लामाले बताए। सबै यात्रुहरुले काठमाडौं सिमकोट हवाई जहाजमा पन्द्र हजार तथा सिमकोटबाट लिमीसम्म हेलिकोप्टरमा प्रतिब्यक्ति पच्चीस हजार भाडा तिरेको उनले बताए।
लिमीका लागि समय भने १७ देखि २० मिनेट हेलिकोप्टरले लगाउने गर्छ । हेलिकोप्टरमा पाँच जना यात्रुहरु मात्र ओसार्ने गरिन्छ । काठमाडौंमा १५ जना बोक्ने जहाजले एक घण्टा पन्द्र मिनेट समय लगाउने गरेका छन्।
काठमाडौंबाट हुम्ला जानु अघि काठमाडौंमा पिसिआर गर्दा रिपोर्ट नेगेटिभ आएकालाई पठाइएको छ । उहाँहरु सबैलाई सिमकोट टेक अप गर्ने बित्तिकै हेलिकोप्टरले लिमी उडान भएको थियो।
लिमीका तील हल्जी र जांङ गाउँका सबै जनाका लागि सुनखानीमा पाल टाँलेर क्वारेन्टिन स्थापना गरि बस्ने ब्यबस्था गरिएको अध्यक्ष लामाले बताए। उनीहरु सबैले चौध दिन क्वारेन्टिनमा बस्नु पर्नेछ। त्यसपछि चेकजाँच गरेर रिपोर्टका आधारमा घर फर्काउने ब्यबस्था गरिने गाउँपालिका स्वास्थ्य शाखाले जनाएको छ।
भर्खरै
लोकप्रिय
