हुम्लाका किसानलाई कोदो टिप्ने चटारो

सिमकोट– हुम्लाका किसानलाई यतिबेला कोदो टिप्न भ्याइनभ्याइ छ। चैत्र महिनामा छरेको कोदो पाकेपछि किसानलाई टिप्ने चटारो सुरु भएको हो।

खार्पुनाथ गाउँपालिका वडा नम्बर ४ का दानसिंह रावलले कोदो पाकेपछि किसानलाई टिप्ने चटारो सुरु भएको बताए। विगतमा भन्दा यसवर्ष केही समय अगाडी पाकेको हुँदा सयममै कोदो टिप्ने चटारो सुरु भएको हो।

हुम्लाको मुख्य बालीभित्र पर्ने कोदो टिप्नका लागि किसानलाई बिहानबाट बेलुकासम्म भ्याइनभ्याइ छ। यसपाली उत्पादनमा समेत बृद्धि हुने किसानहरुले बताएका छन्। विगतमा असोजमा पाक्ने कोदो यसपाली चाँडै पाक्नुमा मौसममा आएको परिवर्तन मुख्य कारण भएको कृषि प्राविधिक अजुर्न रोकायाले बताए।

अर्को, कुनै रोग किरा नलाग्नु र बेला बेलामा पानी परिरहेको कारण कोदो राम्रो फलेको कृषि प्राविधिकको भनाइ छ। हुम्ला जिल्लाका सात वटै गाउँपालिकामा कोदो बाली फल्ने गर्छ।