काठमाडौँ – हुम्लाको सीमा क्षेत्रस्थित नेपाली भूमिमा भवन निमार्ण गरेको सार्वजनिक भएपछि चीनले त्यसको खण्डन गरेको छ।
काठमाडौँस्थित चिनियाँ दूतावासले पत्रकारलाई साे विषयमा जानकारी दिँदै नेपाली भूमिमा भवन नबनाएको उल्लेख गरेकाे हाे।
चिनियाँ दूतावासका प्रवक्ता वाङ सीयओलङले चीन–नेपाल सीमा क्षेत्रमा बनेको भवन चीनकै भूभागमा रहेको प्रमाणित रहेको दाबी गरेका छन्।
चिनियाँ दूतावासका प्रवक्ता वाङ सीयओलङले सीमित पत्रकारलाई सो विषयमा स्पष्ट पार्दै भनेका छन्, ‘चीन र नेपाल मित्रवत छिमेकी हुन् । चीनले जहिले पनि नेपालको सर्वाभौमसत्ता र भौगोलीक सीमा सम्मान गर्छ । सञ्चारमाध्यममा नेपाली भूमिमा चीनले बनाएको भन्ने भवन चीनकै भूमिमा रहेको हामीले पुष्टि गरेका छौँ ।’
उनले अघि भनेका छन्, ‘नेपाली पक्षले पनि त्यस विषयमा फेरि पुष्टि गरोस् । चीन र नेपालबिच सीमालाई लिएर कुनै पनि विवाद छैन । सीमाको विषयलाई लिएर दुई पक्षले सदैव राम्रो संवाद गर्दै आएको छ ।’
चीनले नेपाली भूमि मिचेर भवन निर्माण गरेको खुलेपछि त्यसको स्थलगत निरीक्षण गर्न हुम्लाका प्रमख जिल्ला अधिकारीसहितका सुरक्षा अधिकारीहरुको टोलीले त्यस क्षेत्रको भ्रमण गरेर फर्केको छ। यद्यपि प्रजिअहरुको टोलीले आधिकारिक धारणा सार्वजनिक गरिसकेको छैन।
उक्त टोलीसँगको भेटमा पनि चिनियाँ पक्षले भवन निर्माण भएको क्षेत्र चीनकै रहेको जिकिर गरेको टोलीका सदस्यले जानकारी दिएका छन्।
भर्खरै
लोकप्रिय
