इन्डियन प्रिमियर लिग-आईपीएल क्रिकेटको केहीबेरमा हुने खेलमा दिल्ली क्यापिटल्सले रोयल च्यालेन्जर्स बैंगलोरविरुद्ध पहिला ब्याटिङ गर्ने भएको छ। बैंगलोरका कप्तान विराट कोहलीले टस जितेर पहिला बलिङ गर्ने निर्णय गरेका हुन्।
दिल्लीमा रहेका नेपाली युवा स्पीनर सन्दीप लामिछाने यस खेलमा पनि प्लेइङ सेटमा छैनन्। सन्दीपले यो सिजन आईपीएलका कुनैपनि खेल खेल्न पाएका छैनन्।
दुबई क्रिकेट मैदानमा हुने खेलमा जित हात पार्ने टोली अंक तालिकाको शीर्षस्थानमा पुग्ने छ। दुवै टोलीको चार खेलबाट ६ अंक छ। पाँच खेलबाट ६ अंक भएको मुम्बई इन्डियन्स नेटरनरेटका आधारमा शीर्षस्थानमा छ।
आईपीएलको यो सिजन दुबईमा भएका खेलमा पहिला ब्याटिङ गर्ने टोलीले हारेका छैनन्। संयोग के छ भने दिल्ली र बैंगलोरले पनि यो सिजन पहिला ब्याटिङ गरेका खेलमा हार ब्यहोरेका छैनन्। दिल्लीले तीनवटै खेल पहिला ब्याटिङ गरेर जितेको थियो भने बैंगलोरले दुईवटा खेल पहिला ब्याटिङ गरेर जितेको थियो।
अघिल्लो खेल दुवै टोलीले जितेका थिए। दिल्लीले कोलकाता नाइट राइडर्सलाई हराएको थियो भने बैंगलोरले राजस्थान रोयल्सविरुद्ध जित हात पारेको थियो। दिल्लीले कोलकाताविरुद्ध २ सय २८ रन बनाएको थियो।
यो सिजन दिल्लीका पृथ्वी श, शिखर धवन, श्रेयस अय्यरलगायत ब्याट्सम्यान उच्च लयमा छन्। बैंगलोरका देवदुत पडिक्कल, आरोन फिन्च, विराट कोहली, एबी डे भिलियर्सलगायत ब्याट्सम्यानको दबाब दिल्लीलाई हुने छ।
भर्खरै
लोकप्रिय
