रोनाल्डो बिहीन युभेन्टसको च्याम्पियन्स लिगमा विजयी सुरुवात

इटालियन क्लब युभेन्टसले च्याम्पियन्स लिगको नयाँ सिजनमा विजयी सुरुवात गरेको छ। अवे मैदानमा भएको खेलमा युभेन्टसले डिनामो कियभलाई २–० ले पराजित गरेको हो ।

क्रिष्टियानो रोनाल्डो कोरोना भाइरसबाट संक्रमित भएका कारण आइसोलेशनमा छन्।

रोनाल्डो बिहीन युभेन्टसका लागि अल्भारो मोराताले दुई गोल गरेका हुन् । उनले ४६ र ८४ औँ मिनेटमा गोल गरी टिमलाई जित दिलाएका हुन् । समूह जी मा रहेको युभेन्टस गोल अन्तरका आधारमा बार्सिलोना भन्दा पछि दोस्रो स्थानमा छ ।

च्याम्पियन्स लिग फुटबल अन्तर्गत मंगलबार राति भएका अरु खेलमा क्लब बर्गले जेटिन सेन्ट–पिटर्सबर्गलाई २–१ तथा लाजिओले बोरुसिया डर्टमुण्डलाई ३–१ पराजित गर्दा रिनेस र एफके क्रास्नोडारले १–१ तथा चेल्सी र सेभिल्लाले गोलरहित बराबरी खेलेका छन् ।