कोलकात्ताले दियो दिल्लीलाई १९५ रनको लक्ष्य, सुनिल र नितिशको अर्धशतक

इण्डियन प्रिमियर लिग (आईपीएल) क्रिकेट अन्तर्गत शनिबारको पहिलो खेलमा कोलकात्ता नाईट  राइडर्सले दिल्ली क्यापिटल्सलाई १९५ रनको लक्ष्य दिएको छ।

युएईको अबुधाविमा दिल्लीले टस जितेर फिल्डिङ रोजेपछि पहिले व्याटिङ गरेको कोलकात्ताले निर्धारित २० ओभरमा ६ विकेटको क्षतिमा १९४ रन बनाएको हो।

कोलकात्ताका नितिश राना र सुनिल नारिनले अर्धशतक बनाए। नितिशले ५३ बलमा ५१ रन बनाए भने सुनिलले ३२ बलमा ६४ रन बनाए। यस्तै  कप्तान इयान माेर्गनले १७ र राहुल त्रिपाठीले १३ रन बनाए।

जारी आईपीएलमा १० खेलमध्ये सात खेलमा जित निकालेर १४ अंक जोडेको दिल्ली अंकतालिकामा दोस्रो स्थानमा छ। १० खेल खेलेर १० अंक जोडेको कोलकात्ता अंकतालिकाको चौथो स्थानमा छ।