स्पेनिस ला लिगा फुटबल अन्तर्गत आइतबार राति भएको खेलमा रियल सोसिडाडले हुएस्कालाई ४-१ ले पराजित गरेको छ ।
घरेलु टोली सोसिडाडको जितमा मिकेल ओयार्जाबालले दुई तथा पोर्तुगुएस म्यान्जानेरा र इसाकले एक एक गोल गरे ।
हुएस्काका लागि मिरले एक गोल फर्काएका हुन् ।
३५ औँ मिनेटमा पाएको पेनाल्टीमा ओयार्जाबालले गोल गरी रियल सोसिडाडलाई सुरुवाति अग्रता दिलाए । ४६ औँ मिनेटमा गालान गिलको सहयोगमा मिरले हुएस्काका लागि एक गोल फर्काए । गोरोसाबेलको सहयोगमा उनले ५४ औँ मिनेटमा व्यक्तिगत दोस्रो गोल गरे ।
६८ औँ मिनेटमा म्यानजानेरा र ७५ औँ मिनेटमा इसाकले गोल गरे । दुवै गोलका लागि डेविड सिल्भाले सहयोग गरेका हुन् ।
यो सिजन स्वतन्त्र मूल्यमा म्यानचेस्टर सिटी छोडेर आएका ३४ वर्षे सिल्भाले गोलका लागि सहयोग गरेका हुन् । जितपछि सोसिडाड सात खेलबाट १४ अंकसहित शीर्ष स्थानमा पुगेको छ । उसले एक खेल कम खेलेको रियल मड्रिडलाई पछि पारेको हो ।
ला लिगा अन्तर्गत आइतबार राति भएका अरु खेलमा एलाभेसले रियल भालाडोलिडलाई २-० तथा ग्रानाडाले गेटाफेलाई १-० ले पराजित गरेका छन् । भिल्लारियल र काडिजले गोलरहित बराबरी खेलेर अंक बाँडेका छन् ।
भर्खरै
लोकप्रिय
