दुई जना कोरोना संक्रमितको मृत्यु

नेपालगञ्ज – बाँकेको कोहलपुर मेडिकल कलेजमा उपचार गराउन आएका दाङका दुई जना कोरोना संक्रमितको मृत्यु भएको छ ।

जिल्ला कोभिड–१९ संकट व्यवस्थापन केन्द्र, बाँकेका अनुसार, घोराही उपमहानगरपालिका वडा नं. ९, वनगाउँका ६७ वर्षीय पुरुष र तुलसीपुर उपमहानगरपालिका वडा नं. ९, बेलुवाका ६८ वर्षीय पुरुषको कोहलपुर मेडिकल कलेजमा उपचारका क्रममा शनिबार राति मृत्यु भएको छ ।

केही समयदेखि उच्च रक्तचापको समस्या रहेका घोराहीका ६७ वर्षीय पुरुषलाई स्वास्थ्यमा समस्या आएपछि कात्तिक २५ गते राप्ती स्वास्थ्य विज्ञान, प्रतिष्ठानमा स्वाव जाँच गरिएको थियो ।

भोलिपल्ट कोरोना पुष्टि भयो । त्यसपछि उनलाई कोहलपुर मेडिकल कलेजमा उपचार गराउन ल्याइएको थियो । उनको रातस ११.५० बजे मृत्यु भएको छ ।

तुलसीपुरका ६८ वर्षीय पुरुष स्वास्थ्यमा समस्या आएपछि मंसीर ४ गते कोहलपुरमा उपचार गराउन आएका थिए । उनलाई कोरोना पुष्टि भएपछि त्यही उपचार भइरहेको थियो ।

राती १.४० बजे उनकाे मृत्यु भएको छ । उनलाई केही समयदेखि मधुमेहको समस्या थियो । बाँकेमा बाहिरी जिल्लाबाट उपचार गराउन आउँदा मृत्यु हुने कोरोना संक्रमितको संख्या ४६ पुगेको छ ।