साबिक विजेता युभेन्टस इटालियन सिरी ए फुटबलको पाँचौँ स्थानमा झरेको छ । सिजनका ९ खेल सकिँदा उ शीर्ष चारबाट तल पुगेको हो ।
लिग अन्तर्गत शनिबार राति भएको खेलमा बेनेवेन्तोले युभेन्टसलाई १–१ को बराबरीमा रोकेको हो ।
अवे मैदानमा भएको खेलमा २१ औँ मिनेटमा अल्भारो मोराटाको गोलबाट युभेन्टसले अग्रता लियो । तर उसले सो अग्रता जोगाउन सकेन ।
बेनेवेन्तोका लागि पहिलो हाफको इन्जुरी समयको तेस्रो मिनेटमा लेटिजियाले गोल गरे । पहिलो हाफमा गोल गरेका मोराटा इन्जुरी समयको सातौँ अर्थात ९७ औँ मिनेटमा सीधै रातो कार्ड पाएर मैदानबाट बाहिरिए ।
९ खेलबाट १७ अंक भएको युभेन्टस पाँचौँ स्थानमा आएको छ । रोमा १७ अंकसहित चौथो स्थानमा छ । तेस्रो स्थानको सासुओलोको १८ अंक छ । सासुओलोलाई ३–० ले पराजित गरेको इन्टर मिलान १८ अंक नै भए पनि दोस्रो स्थानमा पुगेको छ । शीर्ष स्थानको एसी मिलानको २० अंक रहेको छ ।
शनिबार राति भएको अर्को खेलमा हेलास वेरोनाले एट्लान्टालाई २–० ले पराजित गरेको छ ।
भर्खरै
लोकप्रिय
