जगदम्बा स्टिलको भट्टि पडकिएर घाइते भएकामध्ये एकजनाको मृत्यु

पर्सा-जगदम्बा स्टिलको फलाम गलाउने भट्टि पडकिएर घाईते भएका मध्ये एक जनाको मृत्यु भएको छ।

भटी पडकिएर घाईते भएका चारजना मध्ये सर्लाही सकरोल गाउँपालिका ६ बस्ने ४० वर्षीय बिकिन्द्र यादबको मृत्यु भएको बाराका प्रहरी प्रबक्ता एवम डिएसपी गौतम मिश्रले जानकारी दिए।

यादवको उपचारको क्रममा किर्तिपुर अस्पतालमा मँगलबार मृत्यु भएको हो। गएको शनिबार बिहान जितपुर सिमरा उप महानगरपालिका २ स्थित जगदम्बा स्टिलको फलाम गलाउने भटी पडकिदा कारखानामा कार्यरत चारजना घाइते भएका थिए।

जसमध्ये यादवको शरिर जलेर उनी गम्भिर घाईते भएका थिए। घाइते भएका मध्ये दुईजना भारतीय नागरिकसहित ३ जना कामदारहरुको अहिले पनि वीरगञ्जको तराई अस्पताल र हेल्थ केयर अस्पतालमा उपचार भई रहेको डिएसपी मिश्रले बताए। ठूलो आवाजसहित भटी पडकिदा स्थानीयबासीहरु भने त्रसित भएका छन्।