काठमाडौँ- हिन्दुराज्य र राजतन्त्रको पक्षमा उभिएको राष्ट्रिय प्रजातन्त्र पार्टी (राप्रपा)ले आफ्ना एजेण्डालाई लिएर सडकमा उर्लिएको आन्दोलनप्रति नैतिक समर्थन जनाएको छ।
नेकपाका अध्यक्ष एवं प्रधानमन्त्री केपी शर्मा ओलीले मगंलबार डाकेको सर्वदीलय बैठकमा सहभागी राप्रपा नेता दिपक बोहोराले यसै संविधानमा आफ्नो दलको माग बमोजिम हिन्दुराज्य र राजतन्त्रको व्यवस्था गर्नुपर्ने माग उठाएको जानकारी दिए।
बैठकपछि उनले भने, ‘संविधान बनाउँदा चौथो पात्र हामी नै थियौँ। तात्कालीन काँग्रेस, एमाले, माओवादी र राप्रपाको संविधानप्रति समर्थन नै थियो। र, अहिले सडकको आन्दोलनप्रति हाम्रो पूर्णरुपमा नैतिक समर्थन छ भनेका छौँ। यसको समाधानका लागि हामीले यही संविधान मातहत हिन्दुराज्य र राजालाई राख्न विकल्प दिएका छौँ।’
नेता बोहोराका अनुसार तर आफुहरुले दिएको विकल्पलाई लिएर प्रधानमन्त्रीलगायत अन्य दलका कुनै पनि नेताले प्रतिक्रिया दिएनन्। नेता बोहोराले आफ्ना माग र अडानबारे निष्कर्षमा पुर्याउन सर्वदलीय बैठकको मागसमेत गरेको जानकारी गराए।
उनले भने,‘यो मुलुकमा राजासहितको लोकतन्त्र र हिन्दु राष्ट्र बनाउने प्रस्ताव गरेपछि कसैबाट पनि जबाफ आएन।’
यस्तै कोभिड-१९ को महामारी नियन्त्रणमा सरकार असफल भएको निष्कर्ष पनि राप्रपाले प्रधानमन्त्री ओलीलाई सुनाएको छ। नेता बोहोराले भने,‘कोभिडको खोप निःशुल्क जनतालाई प्रदान गरिनुपर्छ भन्ने माग हो।’
भर्खरै
लोकप्रिय
