अवे मैदानमा म्यानचेस्टर युनाइटेडको महत्वपूर्ण जित

इंग्लिस प्रिमियर लिग फुटबल अन्तर्गत बिहीबार राति भएको खेलमा म्यानचेस्टर युनाइटेड विजयी भएको छ ।

अवे मैदानमा भएको खेलमा म्यानचेस्टर युनाइटेडले शेफिल्ड युनाइटेडलाई ३–२ ले पराजित गरेको हो । म्यानचेस्टरका लागि मार्कस राशफोर्डले दुई तथा एन्थोनी मार्शलले एक गोल गरे । शेफिल्डका लागि म्याकगोल्ड्रिकले दुई गोल गरे ।

राशफोर्डले २६ र ५१ तथा मार्शलले ३३ औँ मिनेटमा गोल गरेका हुन् । पुछारको क्लब शेफिल्डका लागि डेविड म्याकगोल्ड्रिकले ५ र ८७ औँ मिनेटमा गोल गरे ।

जितपछि छैटौँ स्थानमा पुगेको म्यानचेस्टर युनाइटेडको १२ खेलबाट २३ अंक भएको छ ।

लिग अन्तर्गत बिहीबार राति भएको अर्को खेलमा एस्टन भिल्ला र बर्नलीले गोलरहित बराबरी खेलेका छन् ।