माेरङ– प्रदेश १ मा गत २४ घण्टामा ४३ जना नयाँ संक्रमित थप भएका छन्। शुक्रबार ५ सय ६२ जनाको स्वाब परीक्षण गर्दा ४३ जनामा संक्रमण पुष्टि भएको सामाजिक विकास मन्त्रालयले जनाएको छ।
मन्त्रालयका अनुसार सुनसरीमा १४, मोरङमा १२, झापामा ६, ताप्लेजुङमा २, संखुवासभा र खोटाङमा समान १ र प्रदेश १ बाहिरका ७ जनामा संक्रमण देखिएको छ।
सुनसरीको इटहरी उपमहानगरपालिकामा ७, धरान उपमहानगरपालिकामा ५ र रामधुनी नगरपालिकामा २ जनाको रिपोर्ट पोजिटिभ आएको छ।
त्यसैगरि, मोरङको विराटनगर महानगरपालिकामा ५, केराबारी र ग्रामथान गाउँपालिकामा समान २, उर्लाबारी, लेटाङ नगरपालिका र स्थानीय तह नखुलेकामा समान १ जनामा संक्रमण देखिएको छ।
झापाको विर्तामोड र दमक नगरपालिकामा समान २, भद्रपुर नगरपालिका र बुद्धशान्ति गाउँपालिकामा समान १ जनामा संक्रमण देखिएको छ।
त्यसैगरि पहाडी क्षेत्रतर्फ ताप्लेजुङको पाथीभरा याङवरक र मैंवाखोलामा समान १, संखुवासभाको खाँदबारी र खोटाङको खोटेहाङमा समान १ र प्रदेश १ बाहिरका ७ जनामा संक्रमण देखिएको मन्त्रालयले जनाएको छ। यससँगै हालसम्म प्रदेशमा कोरोना संक्रमितको संख्या २९ हजार २ सय ३० पुगेको छ।
यस्तै प्रदेशमा शुक्रबार १ सय ४३ कोरोना संक्रमित निको भएर डिस्चार्ज भएको मन्त्रालयले जनाएको छ। यसक्रममा प्रदेशका विभिन्न होमआइसोलेसनबाट १ सय २०, विराटनगरमा कोशी अस्पताल कोभिड १९ उपचार केन्द्रबाट १६, बुढीगंगा गाउँपालिकास्थित विराट शिक्षण अस्पतालबाट ४, धरानको वीपी कोइराला स्वास्थ्य विज्ञान प्रतिष्ठानबाट २ र विराटनगरको न्यूरो अस्पतालबाट १ जना डिस्चार्ज भएका हुन्। यससँगै हालसम्म डिस्चार्ज हुनेको संख्या २४ हजार ३ सय ९० पुगेको छ।
यस्तै मोरङ र झापाका समान १ जना पुरुष संक्रमितको उपचारका क्रममा मृत्यु भएको छ। मन्त्रालयका अनुसार हालसम्म संक्रमणका कारण १ सय ३५ महिला र ३ सय १९ जना पुरुष गरि कुल ४ सय ५४ जनाको मृत्यु भएको छ।
भर्खरै
लोकप्रिय
