निर्वाचनको तयारी थाल्न निर्वाचन आयोग र सुरक्षा निकाय प्रमुखहरुलाई प्रधानमन्त्रीको निर्देशन

काठमाडौँ- प्रधानमन्त्री केपी शर्मा ओलीले मध्यावधि निर्वाचनको तयारी थाल्न सुरक्षा निकाय र निर्वाचन आयोगलाई निर्देशन दिएका छन्।

आइतबार साँझ छुट्टाछुट्टै भेटघाटमा ओलीले ती निकायहरुका अधिकारीहरुलाई निर्देशन दिएका हुन्। प्रतिनिधि सभा विघटन गर्ने सिफारिस राष्ट्रपति विद्यादेवी भण्डारीले अनुमोदन गरेपछि प्रधानमन्त्री ओलीले निर्वाचनको तयारीका लागि छलफल अगाडि बढाएका हुन्।

राष्ट्रपतिले आगामी वैशाख १७ र २७ गते मध्यावधि निर्वाचन गर्न मिति तोकेकी छिन्। त्यसअघि आइतबार बिहान बसेको मन्त्रिपरिषद् बैठकले निर्वाचनको मितिसमेत राष्ट्रपतिलाई सुझाएको थियो।

निर्वाचन आयोगका पदाधिकारीसँग भेट गरेपछि प्रधानमन्त्री ओलीले चारवटै सुरक्षा निकायका प्रमुखलाई राखेर छलफल गरेका थिए।