क्यानडामा निर्वासित जिवन बिताइरहेकी एक पाकिस्तानी अधिकारकर्मी मृत फेला परेकी छिन्।
३७ वर्षीय करिमा बालोच मृत भेटिएपछि स्थानीय अधिकारीले अनुसन्धान सुरु गरेको बीबीसीले जनाएको छ। उनी आइतबारदेखि हराइरहेकी थिइन्। बालोचको शव टोरन्टोमा भेटिएपनि कारण उल्लेख गरिएको छैन।
पाकिस्तानको पश्चिममा पर्ने बलोचिस्तानमा जन्मिएकी बालोचले सरकारी सेना र सरकारविरुद्ध बोल्दै आएकी थिइन्। बलोचिस्तानमा लामो समयदेखि पृथकतावादी आन्दोलन चल्दै आएको छ। बालोच पाकिस्तानद्धारा प्रतिबन्धित बालोच स्टुडेन्ट्स अर्गनाइजेसनकी पहिलो महिला नेतृ हुन्।
सन् २००५ देखि क्यानडामा बस्दै आएकी बालोचले पाकिस्तानमा आफुलाई खतरा रहेको भन्दै त्यहाँ आश्रय मागिरहेकी थिइन्। सन् २०१५ मा बालोचले अर्का अधिकारकर्मी हमाल बालोचसँग विवाह गरेकी थिइन्। त्यसको एक वर्षपछि बीबीसीले उनलाई एसियाका टप एक सय प्रेरणादायी र प्रभावशाली महिलाको सूचीमा समावेश गरेको थियो।
बालोचको मृत्युपछि बलोचिस्तान नेसनल मुभमेन्टले ४० दिन शोक मनाउने निर्णय सार्वजनिक गरेको छ।
भर्खरै
लोकप्रिय
