अमेरिकी तल्लो सदनको सदस्यामा निर्वाचित भएका सांसदको कोरोना भाइरसको संक्रमणका कारण निधन भएको छ ।
लुइजियाना राज्यको फिफ्थ डिस्ट्रिक्टबाट हाउस अफ रिप्रिजेनटेटिभ सदस्यमा निर्वाचित भएका ४१ वर्षे लुक लेटलोको मंगलबार निधन भएको हो ।
उनी गएको डिसेम्बर ५ मा भएको रनअफ चुनावमा सांसदमा निर्वाचित भएका थिए । रिपब्लिकन पार्टीबाट निर्वाचित भएका उनले आउँदो आइतबार सांसदको शपथ लिँदै थिए । तर कोरोना भाइरससँगको युद्धमा उनी सफल भएनन् ।
उनले १८ डिसेम्बरमा आफू कोरोना भाइरसबाट संक्रमित भएको जानकारी दिएका थिए । त्यसको भोलिपल्ट उनलाई स्वास्थ्यमा समस्या देखिएपछि अस्पताल भर्ना गरिएको थियो ।
श्रेभेपोर्टमा रहेको अस्पतालमा उपचार हुँदै गर्दा स्वास्थ्य गम्भीर बनेपछि उनलाई डिसेम्बर २३ मा सघन उपचार कक्षमा सारिएको थियो । त्यहिँ उनको मंगलबार निधन भएको हो । उनका श्रीमती र दुई साना सन्तान छन् ।
लुइजियानाका गभर्नर जोन बेल एड्वार्डसले लेटलोको निधनप्रति गम्भीर दुःख व्यक्त गरेका छन् । अमेरिकामा कोभिड–१९ बाट निधन हुने लेटलो पहिलो सांसद (निर्वाचित वा सेवारत) हुन् ।
भर्खरै
लोकप्रिय
