सिमकोट-एक जना बालकको घरको आर्थिक अवस्था कमजोर हुँदा उपचारमा समस्या भएको छ। करेन्ट लागेर दुई वर्ष अगाडि दुवै हात गुमाएका ती बालक हाल गाउँमा सहयोगी हातको याचना गर्दै बसेका छन्।
सर्केगार्ड गाउँपालिका वडा नम्बर १ को तुम्च गाउँका १४ वर्षका बालक गंगा बिक आर्थिक अवस्था कमजोरीका कारण उपचार नपाएर गाउँमा पीडा सहेर बस्न बाध्य भएका हुन।
भारतमा काम गर्न जानेक्रममा करेन्ट लागेर हात गुमाएका बिकलाई आर्थिक अवस्था कमजोर भएकै कारण उपचार हुन नसकेको उब्जन मल्लले बताए।
उनले भने, ‘ उपचारका लागि आबश्यक आर्थिक नभएकै कारण भारतबाट उपचार नगरेरै उनी गाउँ फिर्ता भएका थिए।बुवा पहिले नै बिती सक्नु भएको र आमा पनि अर्कैसँग बिबाह गरेर गएपछि उनको बिचल्ली भयो।’
केही समय अगाडि सर्केगार्ड गाउँपालिकाका उपाध्यक्ष जोशी धामीले सहयोग गरेर उपचार गर्न नेपालगंज लगिएको भएपनि आर्थिक अभावकै कारण उपचार पूरा नभएर फिर्ता आएका थिए उनी।
दुबै हात नभएपछि काम गर्न नसक्ने र कसैले दिएको खानेकुरा खाएर दिन बिताउने गर्दै आएका गंगा परिवारका अन्य सदस्य कोही छैनन्।
घरको आर्थिक अवस्था उपचारका लागि कसैले पनि ऋण दिन मानेका छैनन्।घरको अवस्थाले उपचार गर्न सम्भव नभएपछि उनी रुँदै सहयोगी निकायसँग आफ्नो उपचारका लागि सहयोगको याचना गरेका छन्।
बेसाहारा अवस्थामा हाल गाउँमा बस्दै आएका बिक भने कुनै उपायले उपचार भए केही गरेर खानसक्ने आट मनमा बोकेको बताउँछन्।तर उनको यो इच्छा पूरा हुन भने सहयोगी हातहरुको खाँचो रहेको छ।
भर्खरै
लोकप्रिय
