ब्राजिलको सर्वाधिक जनघनत्व भएको राज्य साओ पाउलोका स्वास्थ्य अधिकारीले नयाँ स्वाथ्य मन्त्रीलाई कोरोना भाइरसको संक्रमण नियन्त्रणका लागि लकडाउन लगाउने बारे सोच्न सुझाव दिएका छन् ।
ब्राजिलमा कोरोना भाइरसको संक्रमण तथा त्यसका कारण हुने मृत्यु लगातार बढ्दै गएका बेला साओ पाउलोका स्वास्थ्य अधिकारीले लकडाउन लगाउनेसम्मको उपायबारे सोच्न नयाँ स्वास्थ्य मन्त्रीलाई आग्रह गरेका हुन् ।
मंगलबार ब्राजिलमा कोरोना भाइरसका कारण २८ सय ४१ जनाको ज्यान गएको सरकारी तथ्यांकले जनाएको छ । साओ पाओलोमा मात्रै ६७९ जनाको ज्यान गएको छ ।
ब्राजिलमा विश्वमै अमेरिकापछि सबैभन्दा धेरै व्यक्ति कोरोनाका कारण संक्रमित र मृत्यु भएको छ ।
स्वास्थ्य मन्त्रीमा नियुक्त भएका मार्सेलो क्वाइरोगाले बुधबार औपचारिक रुपमा जिम्मेवारी सम्हाल्दै छन् ।
उनी महामारी सुरु भएपछि ब्राजिलमा स्वास्थ्य मन्त्रीको जिम्मेवारीमा आउने चौथो व्यक्ति हुन् । उनलाई राष्ट्रपति जायर बोल्सोनारोले सोमबार स्वास्थ्य मन्त्रीको जिम्मेवारी दिएका हुन् ।
ब्राजिलमा कोभिड–१९ का कारण दुई लाख ८२ हजार एक सय भन्दा धेरैको ज्यान गएको छ । यस्तै एक करोड १६ लाख तीन हजार पाँच सय भन्दा धेरै संक्रमित भएका छन् ।
भर्खरै
लोकप्रिय
