झापा- भारतको कोलकाता उच्च अदालतले ४० वर्षपछि कोलकाताको दमदम कारागारबाट मुक्त भएका इलामका दुर्गाप्रसाद तिम्सिनाका परिवारलाई क्षतिपूर्ति चाहिए उपलब्ध गराउन पश्चिम बंगाल राज्य सरकारलाई आदेश दिएको छ।
दुर्गाप्रसादको परिवार विपन्न भएकाले उनको परिवारले क्षतिपूर्ति मागे उपलब्ध गराउन पश्चिम बंगाल सरकारलाई अदालतले सोमबार आदेश दिएको हो।
दुर्गाप्रसादका तर्फबाट मुद्दा लडेका भारतीय कानुन व्यवसायी हिरक सिन्हाका अनुसार क्षतिपूर्ति दिन आदेश जारी भए पनि कति दिने भन्ने उल्लेख छैन।
अदालतले आदेशमा भनेको छ, ‘कानुन अनुसार क्षतिपूर्ति उपलब्ध गराउनु।’
दुर्गाप्रसादको मानसिक अवस्था ठिक नभएको र गरिखाने अवस्था नभएको जानकारी अदालतले पाएको भन्दै राज्य सरकारलाई क्षतिपूर्ति दिन आदेश गरिएको अदालतद्वारा सोमबार जारी आदेशमा उल्लेख गरिएको छ।
कुनै सुनुवाइबिना ४० बर्ष काराबास बिताएर शनिवार रिहा भएर आइतबार घर फर्केका छन्।
कोलकता उच्च अदालतले उनलाई रिहा गर्न गत बुधबार आदेश दिएपछि शनिबार बिहान दमदम कारागार प्रशासनले दुर्गाप्रसादलाई कोलकातास्थित नेपाली महावाणिज्यदूतावासको रोहबरमा परिवारको जिम्मा लगाएको थियो।
भर्खरै
लोकप्रिय
