आफूहरुलाई कारवाही गर्ने अधिकार ऐन महरलाई नभएको नेता लामाको प्रतिक्रिया

काठमाडौँ- नेकपा एमाले अनेरास्ववियुका नेता आरती लामाले आफूहरुलाई कारवाही गर्ने अधिकार महासचिव ऐन महरलाई नभएको प्रतिक्रिया दिएकी छन्। नियम विपरीत आफूहरुलाई निष्काशन गर्ने निर्णय मान्य नहुने प्रतिक्रिया उनले दिएकी हुन्।

अनेरास्ववियुमा अध्यक्ष नविना लामा सांसद भएपछि त्यो हैसियतमा रहेका ऐन महरले आरती लामासहित निवर्तमान सचिवहरू सुदेश पराजुली, वसिम आलमलाई संगठनको साधारण सदस्यसमेत नरहने गरी निष्काशन गरेको मंगलबार विज्ञप्तिमार्फत सार्वजनिक गरेका थिए।

संगठनको हित विपरित गतिविधि गरेको आरोप लामासहित अन्य दुई जनालाई लगाइएको छ। स्पष्टीकरणको जबाफ दिन अटेर गरेकाले उनीहरुलाई कारवाही गरेको महरको दाबी छ। तर उनको आफूहरुलाई कारवाही गर्ने हैसियत नभएको लामाले दाबी गरिन्।