बुटवल – लुम्बिनी प्रदेशका मुख्यमन्त्री शंकर पोखरेलले राजीनामा दिएका छन्।
पोखरेलले प्रदेश प्रमुख धर्मनाथ प्रसाद यादवसमक्ष राजीनामा बुझाएका हुन् । राजीनामा स्वीकृत भएको प्रदेश प्रमुखको कार्यालयले जनाएको छ।
उनीविरुद्ध नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा)ले अविश्वास प्रस्ताव दर्ता गरेका थिए।
उनीविरुद्धको अविश्वासको प्रस्ताव आज प्रदेश सभामा पेश हुन लागेको छ। प्रदेश सभाको बैठक आज दिउँसो १ बजे बस्न लागेको छ। उनले प्रदेश सभाको बैठक बस्नु अघि नै राजीनामा दिएका हुन्।
लुम्बिनीमा नयाँ र बलियो सरकार बनाउन राजीनामा दिएको मुख्यमन्त्री पोखरेलले बताएका छन्। श्रोतका अनुसार जसपा र एमालेको गठबन्धन सरकार बनाउने कसरत भइरहेको छ।
वैशाख ६ गते नेपाली कांग्रेस, नेकपा माओवादी केन्द्र र जसपाको गठबन्धनले अविश्वासको प्रस्ताव दर्ता गर्दै विशेष अधिवेशन माग गरेअनुसार प्रदेश प्रमुखले आह्वान गरेको प्रदेशसभाको विशेष अधिवेशन आइतबार सुरु हुँदैछ ।
आइतबार दिउँसो १ मुख्यमन्त्री पोखरेलविरूद्ध प्रदेशसभा सचिवालयमा दर्ता भएको अविश्वासको प्रस्ताव सदनमा टेबुल हुने कार्यसूचि रहेकोमा उनले त्यसअघि नै राजीनामा दिएका हुन् ।
तीन दलबिच गठबन्धन बनेर अविश्वासको प्रस्ताव दर्ता भए पनि निर्णायक मानिएको जसपाका चार सांसद भने मन्त्री बनेका थिए।
भर्खरै
लोकप्रिय
