धार्नी पुग्यो बिसौलीको

फेरौँ तुलो भनि ताते काँटा सर्‍यो आखिर
धार्नी पुग्यो बिसौलीको घाटा पर्‍यो आखिर।।

देखाइ देखाइ चपाए भोक लागेको झोकमा
लड्डु निल्दा गानो गोला बायु भर्‍यो आखिर।।

पछार्नलाई दौड धुप गरे ग्वार मागी मागी
चोट पायो आफ्नै नाकले मेख मर्‍यो आखिर।।

आफ्नो भागमा आयो भनी गन्ती गर्न थाले
हरियो घाँस उता देख्यो उतै चर्‍यो आखिर।।

लाठे भारि नपुग भयो म्याद सकियो उता
सपनाको मेचले गर्दा निन्द्रा हर्‍यो आखिर।।

खेल खेल्दा झेल गर्ने ठाडो घोप्टो उस्कै
च्याँखे थाप्ने पाखा लागे गर्नु गर्‍यो आखिर।।

खाउँला भनि जम्मा भए बोटको वरिपरि
फल नपाकि सडेर भुइँमा झर्‍यो आखिर।।

कोही देखिएन चतुरोको दाउ पेच जान्ने
आफैँले डाके खड्गो आफै टर्‍यो आखिर।।