खोटा देखिए

तातो ताउमा दुई–दुईवटा रोटा देखिए।।
गन्ती भन्दा बढि सांसदका कोटा देखिए।।

एउटा विधान दुईटा अर्थ जता लगे हुने
नीति निएम बनाउने चाहिँ छोटा देखिए।।

घ्याम्पा गाग्री भाग लागेन पारे आफै तिर
भाइका भागमा प्वाल परेका लोटा देखिए।।

बिरालो झैँ ढुकि बस्थे पारौँ क्वाप्प भनी
लुकाइ देखाइ तुम्बा भर्दा मोटा देखिए।।

सल्लाह साउती गर्न ठाउँ नपाउँदा खेरि
कानेखुसी गर्दा होटेलका कोठा देखिए।।

दौरा सुरुवाल दिए पहिला पछि थुतेछन्
चतुरेको महाजालमा पर्दा भोटा देखिए।।

डुकुलण्ठु आजदेखि गयो जागिर सांसद
लड्डु चपाउँदा खिचिएका फोटा देखिए।।

यता छोडी उता दौडिए झण्डा डण्डा पाए
अड्डामा गइ नालीस हाल्दा खोटा देखिए।।