सिमकोट – जिल्लामा कोरोना संक्रमण बढिरहेका बेला स्वास्थ्य सेवा कार्यालयमार्फत स्वास्थ्य सामग्री सहयोग गरिएको छ।
कोरोना संक्रमणविरुद्ध परिचालन हुने स्वास्थ्यकर्मी र संक्रमित बिरामीको उपचारमा सहयोग पुर्याउन ती स्वास्थ्य सामग्री सहयोग गरिएको हो।
केही सामग्रीको अभाव र जिल्लामा आवश्यकता देखिएको बेला कोरोना संक्रमणविरुद्धका स्वास्थ्य सामग्री सहयोग प्राप्त भएको स्वास्थ्य सेवा कार्यालयका प्रमुख प्रेमबहादुर सिंहले जानकारी दिए।
कोरोना संक्रमणविरुद्ध अत्यावश्यक सामग्री प्राप्त भएकाले यसले स्वास्थ्यकर्मी परिचालन र बिरामीलाई उपचारमा सहयोग पुग्ने उनले बताए।
शिक्षा र स्वास्थ्य क्षेत्रमा काम गर्दै आएको आधार विकास नेपालले कोरोना संक्रमणविरुद्ध प्रयोग हुने सामग्री स्वास्थ्य सेवा कार्यालयलाई सहयोग उपलब्ध गराएको सो कार्यक्रमका शिक्षा अधिकृत कुन्जोक लामाले बताए। आधार विकास नेपालले सहयोग उपलब्ध गराएका सामग्रीमा एक थान अक्सिजन कन्सन्ट्रेटर, केएन ९५ मास्क ५ सय पिस, ६ हजार थान सर्जिकल मास्क, नब्बे बोतल सेनिटाईजर, सर्जिकल ग्लोब ६ सय पिस, १० थान पीपीई सेटलगायत छन्।
त्यससँगै एक सय लिटर पेट्रोल पनि सहयोग उपलब्ध गरिएको छ। यी सामग्रीबाट उपचारमा सहयोग पुगोस र एकद्वार प्रर्णालीबाट उपचारका सामग्री वितरण गर्न कार्यालयलाई सहयोग गरिएको उनले बताए।
ती सामग्री जिल्ला कोरोना संक्रमण व्यवस्थापन कमिटीका संयोजक प्रमुख जिल्ला अधिकारी गणेश आचार्यमार्फत सहयोग उपलब्ध गरिएको थियो।
भर्खरै
लोकप्रिय
