सिमकोट – कोरोनाको दोस्रो लहर चलेयताका अधिकांश कोरोना संक्रमितमा लक्षण देखिएको छैन। एन्टिजेन किटबाट कोरोना परीक्षण गर्दा कोरोना पुष्टि भए पनि दश दिन आइसोलेसनमा बस्ने क्रममा बिरामीको उक्त अवस्था देखिएको हो।
कोरोना परीक्षण गर्दा संक्रमित पुष्टि भएका हुम्ला जिल्लाका अधिकांश बिरामी लक्षणबिनाकै रहेको जिल्ला अस्पतालबाट कोरोना बिरामीको उपचारमा संलग्न चिकित्सक टासी आङ्जु लामाले जानकारी दिए।
कोरोना पुष्टि भएर आइसोलेसनमा बस्दै आएका संक्रमित नौदेखि १० दिनमा घर फर्किएको र आइसोलेसन बसाइको अवधिमा उनीहरूमा कुनै पनि कोरोनाको लक्षण नदेखिएको उनले बताए।
हुम्ला जिल्लाका सात वटै गाउँपालिकामा एन्टिजेन किटबाट एक हजार एक सय १२ जनालाई परीक्षण गर्दा १६५ जनालाई कोरोना पुष्टि भएको थियो। त्यसमा १४५ जना बिना लक्षणका थिए। कोरोना पुष्टि भएकामध्ये ६ जनालाई अक्सिजन आवश्यक परेको र १५ जनालाई सामान्य रुघाखोकी, ज्वरो आउने समस्या देखिएको डा. लामाले बताए।
बाँकी सबैलाई कोरोना पुष्टि भए पनि कुनै लक्षण नै नदेखिएको स्वास्थ्य सेवा कार्यालयले जनाएको छ।
हुम्लाका सातमध्ये ६ वटा सिमकोट, खार्पुनाथ, सर्केगार्ड, चंखेली, अदानचुली र ताँजाकोट गाउँपालिकामा कोरोना संक्रमित देखिएका छन्।
श्वासप्रश्वासमा एक जनालाई समस्या देखिएपछि कर्णाली स्वास्थ्य विज्ञान प्रतिष्ठानमा रिफर गरिएको थियो।
हाल आइसोलेसन तथा होम आइसोलेसनमा ७५ जना र ९० जना सञ्चो भएर घर फिर्ता भएका छन्।
भर्खरै
लोकप्रिय
