सिमकोट– हुम्लामा निषेधाज्ञाकाबीच बजार अनुगमनका क्रममा भेटिएका म्याद गुज्रेका खाद्य सामाग्री नष्ट गरिएको छ। अनुगमनका क्रममा भेटिएका खाद्य वस्तु उपभोगका लागि समय सीमा नाघेको कारण नष्ट गरिएको हो।
बजारमा अनुगमन गर्दा म्याद गुज्रेका खाद्यवस्तु तथा जङ्क फुड बरामद गरेर नष्ट गरिएको उद्योग तथा उपभोक्ता हित संरक्षण कार्यालयका प्रमुख ध्रुव डाहा मगरले बताए।
बजार क्षेत्रका अधिकांश पसलहरुमा पेय पदार्थ, चाउचाउ, बिष्कुट, चकलेट, मसला, चिउरा, भुजा, हर्लिक्स लगायतका २६ प्रकारका सामाग्री बरामद भएको र ती सबै पोलेर नष्ट गरिएको उनले बताए। एक लाख मूल्य बराबरका सामाग्रीहरु नष्ट भएको उनले जानकारी दिए।
बजार अनुगमन समितिले दुई दिन लगाएर सो कार्य गरेको थियो।
हुम्लामा अनुगमन नहुँदा म्याद गुज्रेका दैनिक उपभोग्य बस्तु, पेय पदार्थ र जंङ्क फुड उपभोग गर्न उपभोक्ता बाध्य थिए। यस्ता सामाग्री बिक्री गर्ने व्यापारीहरुलाई यो अनुगमनले गतिलो सबक सिकाएको उद्योग वाणिज्य संघका उपाध्यक्ष राम बहादुर भण्डारीले बताए।
भर्खरै
लोकप्रिय
