काठमाडौँ – सरकारले जारी गरेको निषेधाज्ञाका कारण ज्यालादारी गरेर छाक टार्दै आएका ३ सयभन्दा बढी श्रमिक, अपांग, अशक्त र वृद्धवृद्धालाई दैनिक खाना वितरण गर्दै आएका शीतलप्रसाद शर्माले राहतसमेत प्रदान गरेका छन्।
कोरोना कहरका कारण समस्यामा परेकाहरूलाई २० केजी चामल, २ केजी नुन, ५ केजी दाल र ३ लिटर तेलका दरले बिहीबारबाट ३ सयभन्दा बढी परिवारका लागि राहत वितरण गरेका हुन्।
निषेधाज्ञा सुरु भएसँगै लाइन्स क्लब अफ काठमान्डु ग्लोबल फ्रेन्डका चार्टर प्रेसिडेन्ट यस सामाजिक अभियानमा शर्माले निजी सवारी साधन प्रयोग गरेर काठमाडौंका विभिन्न स्थानमा पुगी निःशुल्क खाना वितरण गरिरहेका छन्।
रोगसँगै भोकले चाहिँ कसैको ज्यान नजाओस् भन्ने उद्देश्यसाथ अभियान सञ्चालन गर्दै आएको शर्माले बताए।
उनले भने, ‘कोभिड–१९ महामारीको दोस्रो लहर सुरु भएसँगै दैनिक ३ सयभन्दा बढीलाई निःशुल्क खाना वितरण गर्दै आएको छु। र, बिहीबारबाट राहतसमेत वितरण सुरु गरेका छौँ।’ राहत वितरणका लागि कोटेश्वरस्थित ‘सदस्य सेवा बचत तथा ऋण सहकारी संस्था’ले प्रायोजन गरेको छ।
त्यसका साथै निःशुल्क खाना तथा राहत वितरण निषेधाज्ञाभरि चलिरहने लाइन्स क्लबका अध्यक्ष शर्माले जानकारी दिए।
भर्खरै
लोकप्रिय
