हुम्ला – पहाडी तथा तराईका जिल्लाहरुमा किसान धान बाली लगाउने चटारोमा छन् । तर हिमाली जिल्ला हुम्लाका किसानका लागि भने यो समय गहुँबाली भित्र्याउने बेला हो ।
किसानका खेतमा गहुँ पाकेको छ । प्रमुख खाद्यन्न बालीका रुपमा रहेको गहुँ यो वर्ष राम्रो फलेको छ । तर बाली पाकेर भित्र्याउने बेला लगातार परेको पानीका कारण क्षति पुगेको किसानहरुले बताएका छन् ।
पाकेको गुहँका बालामा अहिले टुसा उम्रिएको छ । बालामै गहुँले जमराको रुप लिएपछि रहर लाग्दो बाली देखेका किसानको खुशी चिन्तामा बदलिएको छ ।
गहुँ बालीमा क्षति पुगेपछि हुम्लामा खाद्य संकटको अवस्था आउन सक्ने जोखिम पनि बढेको स्थानीयले बताएका छन् । बालामै उम्रिए पनि किसानहरुले बाली भित्र्याउन भने छोडेका छैनन् ।
खार्पुनाथ गाउँपालिकामा मात्र ७० रोपनी जग्गामा लगाएको गहुँमा क्षेती पुगेको छ । बाला टिपे पनि फसल काम नलाग्ने कृषि प्राबिधिकले बताएका छन् । देश सञ्चारका राजन रावतले हुम्लाका किसानले लगाएको गहुँ बालीका केही तस्बिरहरु खिचेका छन् ।
भर्खरै
लोकप्रिय
