सिमकोट– कर्णाली प्रदेश सरकारका उद्योग, पर्यटन वन तथा वातावरण मन्त्री नन्दसिंह बुढाको टोली प्रवेशद्वारको उद्घाटन गर्न हेलिकोप्टरमा हुम्ला आउने भएको छ।
नेपाल र चीनको सीमाना हिल्सामा गत वर्ष निर्माण भएको प्रवेशद्वारको उद्घाटन तथा प्रदेश सरकारले जिल्लामा निर्माण गरेका कार्यक्रमहरुको अनुगमन गर्न टोली हुम्ला आउन लागेको हो।
कर्णाली प्रदेश सरकारका पर्यटन मन्त्री बुढा हेलिकोप्टरमा प्रवेशद्वार उद्घाटन गर्न आउन लागेको डिभिजन वन कार्यालयका प्रमुख रेनुका न्यौपानले बताइन्। मन्त्रीसँग आउने अरुको टुंगो नभएको उनको भनाइ छ।
मन्त्रीसँगै हुम्ला आउनेको सुर्खेतमा पास मिलाउने काम भइरहेको बताइएको छ। हेलिकोप्टरमा आउन लागेको मन्त्रीको टोली सिमकोटबाट हिल्सा जानेछ।
कर्णाली प्रदेश उद्योग, पर्यटन, वन तथा वातावरण मन्त्रालयको आर्थिक सहयोग र डिभिजन वन कार्यालय हुम्लाको प्राविधिक सहयोगमा प्रवेशद्वार निर्माण भएको हो।
मन्त्रीको टोली एक रात जिल्लामै बस्नेछ। उद्घाटन कार्यक्रम कोरोना कहरका कारण रोकिएको थियो। ७५ लाखमा सीमा प्रवेशद्वार निर्माण सम्पन्न भएको थियो। निर्माण उपभोक्ता समितिसमेत सिमकोटमै रहेका छन्। हेलिकोप्टरले हिल्साका लागि दुई उडान भर्ने व्यवस्थाका लागि तयारी भइरहेको छ।
भर्खरै
लोकप्रिय
