काठको साँघु तर्ने क्रममा चिप्लिएर नदीमा खस्दा दुई जना बेपत्ता

सिमकोट – काठको साँघु तर्ने क्रममा चिप्लिएर नदीमा खस्दा दुई जना बेपत्ता भएका छन्। बेपत्ता हुनेमा ४२ वर्षीय जस्या रावल र १६ वर्षीया सुनिता रावल छन्।

हुम्लाको खार्पुनाथ गाउँपालिका–२ थाली र बाजुराको कवाडी सीमा क्षेत्रमा अवस्थित यार्बाबाट उनीहरू बेपत्ता भएको जनाइएको छ। उनीहरू बाजुराको वन क्षेत्रमा जडीबुटी संकलन गर्न जाने क्रममा बुधबार साँझदेखि बेपत्ता भएको स्थानीय तारा रावलले जानकारी दिइन्।

हराइरहेकाहरूको खोजी जारी रहेको उनले बताइन्। जडीबुटी संकलनका लागि थाली गाउँका करिब ३० जना गएका बताइएको छ।

हुम्लासहित बाजुरा, मुगु, बझाङलगायत नागरिक यस याममा जडीबुटी संकलन गर्न पाटनतिर जाने गर्छन्।