काठमाडौँ – वर्षा र सहकालका देवता इन्द्रको नाममा गरिने इन्द्रजात्राअन्तर्गत शनिबार बिहान इन्द्रध्वजोत्थान गरिएको छ । बिहान ६ः५१ बजेको साइतमा इन्द्रध्वजोत्थान अर्थात ध्वजापताकासहितको लिंगो ठड्याइएको हो ।
इन्द्रध्वजोत्थान गरेपछि जात्राको मुख्य दिन असोज ३ गते कुमारीलाई तल्लो टोल यात्रा गराइन्छ। असोज ४ गते माथिल्लो टोल यात्रा गराइने कार्यक्रम रहेको हनुमानढोका दरबार हेरचाह अड्डाका कार्यालय प्रमुख सन्दीप खनालले जानकारी दिए।
असोज ८ गते नानिचा यात्रा गरिनेछ। त्यसै दिन राति १०ः३६ बजे इन्द्रध्वज पतन गर्ने साइत रहेको छ।
कोरोना महामारीका कारण गत वर्ष पूजा आराधनामात्र गरेर यात्रा स्थगित गरिएको थियो। यस वर्ष सरोकार भएका निकायको बैठकले स्वास्थ्य मापदण्ड पालना गरी न्यूनतम उपस्थिति गराएर जात्रा गर्न लागिएको गुठी संस्थान काठमाडौँ कार्यालय प्रमुख हरिप्रसाद सुवेदीले जानकारी दिए।
देश सञ्चारका फोटो पत्रकार सुलभ श्रेष्ठले इन्द्रध्वजोत्थानका केही तस्बिर खिचेका छन्।
भर्खरै
लोकप्रिय
