काठमाडौँ – काठमाडौँको बसन्तुपरस्थित हनुमानढोका दरबारमा रहेको दसैँ घरमा विधिवत रुपमा घटस्थापनासहित जमरा राखिएको छ। हर्षबढाईँ र विशेष पूजासहित बिहान ११ बजेर ४६ मिनेटको साइतमा हनुमानढोका दसैँ घरमा जमरा राखिएको हो।
प्रत्येक वर्ष आश्विन शुक्ल प्रतिपदादेखि सुरु हुने बडादसैँ बिहीबारदेखि सुरु भएको हो। यो पर्व आश्विन शुक्ल पूर्णिमासम्म १५ दिन धुमधामका साथ मनाउने गरिन्छ।
बडादसैँको पहिलो दिन घरघरमा विधिपूर्वक दियो, कलश र गणेश स्थापनासहित घटस्थापना गरिन्छ। पूजा कोठा वा दसैँ घरमा वैदिक विधिपूर्वक शक्तिकी अधिष्ठात्री देवी दुर्गाको आह्वान गरी पूजा आरम्भ हुन्छ।
नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजा कोठा अथवा दसैँ घरमा विधिपूर्वक राखेर त्यसमाथि यव अर्थात् जौ रोप्ने गरिन्छ। यस कार्यलाई जमरा राख्ने पनि भनिन्छ।
यव अङ्कुर दुर्गा देवीको प्रिय वस्तु भएकाले आज यव रोपण गरी दुर्गालाई चढाएर विजया दशमीको दिन टीका प्रसादसितै समृद्धिको प्रतीक पहेँलो जमरा पनि ग्रहण गरिन्छ।
हनुमान ढोका दसैँ घरमा गरिएको घटस्थापनाका केही तस्बिर देश सञ्चारका फोटो पत्रकार सुलभ श्रेष्ठले खिचेका छन् ।
भर्खरै
लोकप्रिय
