काठमाडौँ- इसाइ धर्मावलम्बीहरुको मुख्य पर्व क्रिसमस नजिकिएसँगै काठमाडौं लगायत देशभर चहलपहल बढेको छ।
क्रिसमसको अघिल्लो दिन शुक्रबार काठमाडौंका सपिङ मलहरु र रेष्टुरेन्टहरुमा चहलपहल देखिन्छ। धेरै सपिङ मल र मुख्य बजार क्षेत्रमा सजावट र झिलिमिली पारेर उज्यालो बनाइएको छ । मानिसहरु सजाइएको सपिङ मलहरुमा फोटो खिचेर र टिकटक बनाएर रमाइरहेका छन् ।
क्रिसमसअघिको साँझलाई क्रिसमस इभको रुपमा मनाइन्छ।
हरेक वर्ष २५ डिसेम्बरमा येशु ख्रिष्टको जन्मदिनको खुसियाली मनाउने परम्पराअनुसार क्रिश्चियन धर्मावलम्बीले क्रिसमस मनाउदै आएका छन् । क्रिसमसको दिन चर्च गएर विसपहरुबाट ज्ञान लिने, खुशीयाली साटासाट गर्ने जस्ता क्रियाकलापहरु गरिने इसाई धर्मावलम्बी बताउँछन्। अन्य दिन फादरहरुबाट ज्ञान लिने गरिए पनि क्रिसमसको दिन भने विसपहरुबाट ज्ञान लिने परम्परा रहेको इसाई धर्मावलम्बी फ्रेन्सेज गुरुङ बताउँछन् । नेपालमा क्रिसमसको दिन सार्वजनिक विदा दिइएको छ।
गत बर्ष कोरोना महामारी नियन्त्रणका लागि जारी गरिएको लकडाउनका कारण क्रिसमसको उत्साह खासै देखिएको थिएन।
यस बर्ष नयाँ भेरियन्ट ओमिक्रोनको संक्रमण बढिरहे पनि बजार खुला रहेकाले क्रिसमसप्रति आकर्षण देखिएको छ।
पछिल्लो केही वर्ष यता सबै धर्मावलम्बीहरुले क्रिसमस मनाउने गरेको पाइन्छ ।
भर्खरै
लोकप्रिय
