काठमाडौँ- यूएईमा जारी एसिसी यू-१९ एसिया कपअन्तर्गत आफ्नो पहिलो खेलमा नेपाल बंगलादेशसँग एक सय ५४ रनले पराजित भएको छ। २ सय ९८ रनको लक्ष्य पाएको नेपालले ४२.३ ओभरमा सबै विकेट गुमाएर एक सय ४३ रन मात्र जोड्यो।
विवेक यादब र गुल्सन झाले सातौँ विकेटका लागि ६० रनको साझेदारी गरेपनि नेपालले फराकिलो हार टार्न सकेन। नेपालले तीन रनको अन्तरमा अन्तिम चार विकेट गुमाएको थियो। विवेकले २६, गुल्सनले ३५ र विवेक मगरले ३३ रन जोडे।
नेपालका प्रारम्भिक ब्याट्सम्यानद्धय अर्जुन कुमाल ५ तथा कप्तान समेत रहेका देव खनालले १२ रन जोडे। सन्तोष कार्की ३ र विकेटकिपरसमेत रहेका अर्जुन साउद १५ रनमा आउट भए। त्यसअघि टस जितेर पहिला ब्याटिङ गरेको बंगलादेशले निर्धारित ५० ओभरमा ४ विकेट गुमाएर २ सय ९७ रन जोड्यो। बंगलादेशका प्रान्तिक नरोज नाबिल एक्लैले एक सय २७ रन जोडे। विकेटकिपर मोहम्मद फाहिमले पनि ५८ रन बनाए।
बंगलादेशले चौथो विकेटका लागि एक सय ७९ रनको साझेदारी गरेको थियो। तेस्रो नम्बरमा ब्याटिङ गर्न आएका नाबिलले एक सय १२ बलमा एक छक्का र ११ चौका प्रहार गरे।
नेपालका गुल्सन झा, तिलक भण्डारी र मोहम्मद अदिल खानले एक एक विकेट लिए। नेपाल रहेको समूह बीमा श्रीलंका र कुवेत पनि रहेका छन्। नेपालले दोस्रो खेल आइतबार श्रीलंकाविरुद्ध खेल्ने छ।
भर्खरै
लोकप्रिय
