विश्वमा यसअघि आँकलन गरिए भन्दा वनस्पति (रुख) का प्रजाति १४ प्रतिशत धेरै रहेको एक अध्ययनमा उल्लेख गरिएको छ ।
अनुसन्धानकर्ताहरुले रुखका प्रजातिका सम्बन्धमा भएको विश्वको पहिलो वैज्ञानिक रुपमा विश्वसनीय आँकलन रहेको बताएका छन् ।
अनुसन्धानकर्ताका अनुसार विश्वमा ७३ हजार तीन सय प्रजातिका रुख छन् । यो यसअघि आँकलन गरिएको भन्दा १४ प्रतिशत बढी हो । अझै ९ हजार दुई सय प्रजातिका रुखहरु पहिचान गर्न बाँकी रहेको वैज्ञानिकहरुले उल्लेख गरेका छन् ।
दुर्लभ प्रजातीहरु अधिकांश रुपमा उष्णप्रदेशीय वनमा रहेको र ती प्रजाति तीव्र गतिमा लोप हुँदै गएको अनुसन्धानमा उल्लेख छ । यसरी दुर्लभ प्रजातिहरु लोप हुनुमा विश्वव्यापी रुपमा भइरहेको जलवायु परिवर्तन तथा वन फडानी कारक रहेको अनुसन्धानकर्ताले बताएका छन्।
विश्वभरका एक लाख भन्दा बढी वन क्षेत्रका दशौँ लाख रुखहरुको तथ्यांक विश्लेषण गरी अध्ययन प्रतिवेदन तयार पारिएको हो ।
युनिभर्सिटी अफ मिनेसोटाका प्रमुख अनुसन्धानकर्ता डा. पिटर रिचका अनुसार अनुसन्धानले विश्वभरका वन क्षेत्रको जैविक विविधतामा रहेको संकटलाई उजागर गरेको छ ।
आफूहरुको अध्ययनले वन क्षेत्रका दुर्लभ वनस्पतिको पहिचानमा सहयोग गर्ने उनले बताएका छन् ।
विश्वभरका १४० वैज्ञानिकहरु अध्ययनमा खटिएका थिए । पिएनएएसमा साे अध्ययन प्रकाशित भएको हो ।
भर्खरै
लोकप्रिय
